Meginhlutverk Öryggisráðsins
er að viðhalda friði í heiminum og rannsaka alla
atburði sem gætu leitt til stríðs. Alls eiga
15 lönd sæti í Öryggisráðinu.
Bandaríkin, Kína, Rússland, Frakkland og Bretland
eiga fastasæti en tíu fulltrúar eru kosnir til
tveggja ára í senn frá öðrum meðlimum
Sameinuðu þjóðanna. Öryggisráðið
er eina stofnun Sameinuðu þjóðanna sem getur
beitt þá, sem brjóta frið, efnahagslegum
eða hernaðarlegum refsiaðgerðum. Til að hægt
sé að beita friðarspilla efnahagslegum eða hernaðarlegum
þvingunum verða fastafulltrúarnir fimm að vera
sammála um refsiaðgerðirnar. Á tímum
kalda stríðsins var slíkum refsingum sjaldan beitt,
vegna þess fastafulltrúarnir notuðu neitunarvald
sitt óspart til að stoppa ályktanir sem þeir
töldu að gengju gegn hagsmunum þeirra. Fram á
upphaf áttunda áratugarins beittu Bandaríkin
til dæmis neitunarvaldi sínu til að koma í
veg fyrir að fjölmennasta ríki veraldar, Kína,
fengi aðild að Sameinuðu þjóðunum.
Allt fram til ársins 1972 átti Tævan sæti
í Sameinuðu þjóðunum í stað
Kína. Kínverjar hafa hins vegar aldrei viðurkennt
sjálfstæði Tævan, heldur álitið
það hluta af Kína.
Öryggisráðið átti
mun auðveldara með að sinna skyldum sínum eftir
að kalda stríðinu lauk, eins og sást vel þegar
Írak réðst inn í Kúveit árið
1990. Sama ár samþykktu allir fastafulltrúar
Öryggisráðið að beita Írak efnahagslegum
refsiaðgerðum. Þær aðgerðir skiluðu
litlu sem engu og því var gripið til þess
ráðs að senda herlið á vegum Sameinuðu
þjóðanna, en undir stjórn Bandaríkjamanna,
til Kúveit. Hlutverk hersins var að koma íraska
innrásarliðinu með valdi út úr Kúveit.
Stríðið, sem kallað var Persaflóastríðið,
endaði með algjörum ósigri Íraka, sem
þar að auki urðu að sætta sig við harðar
refsiaðgerðir eftir að stríðinu var lokið.
Öryggisráðið samþykkti meðal annars
að beita Íraka viðskiptaþvingunum, sem þýddi
að Írakar máttu ekki flytja út olíu
fyrr en þeir voru búnir að uppfylla öll skilyrði
sem Sameinuðu þjóðirnar gerðu til þeirra.
Sameinuðu þjóðirnar settu Írökum
meðal annars þau skilyrði að þeir yrðu
að eyðileggja stóran hluta af vopnabirgðum og
vopnaverksmiðjum sínum og eins urðu þeir að
gefa eftir kröfu sína um að innlima Kúveit
í Írak. Í hinum vestræna heimi glöddust
margir yfir úrslitum Persaflóastríðsins.
Meðal þróunarlanda voru mörg ríki áhyggjufull
og héldu því fram að ríku löndin
hefðu misnotað Sameinuðu þjóðirnar
því þau hefðu einungis blandað sér
inn í átökin milli Írak og Kúveit
til að tryggja sér næga olíu.
Hróður Sameinuðu þjóðanna
jókst á árunum sem á eftir komu. Samtökin
aðstoðuðu við að koma á frjálsum
kosningum í Namibíu, Mósambík og Kambódíu
og aðstoðuðu flóttamenn við að snúa
aftur heim til Kambódíu, Nígaragúa og
Afganistan. Árið 1992 samþykkti Öryggisráðið
að beita Serba olíu- og viðskiptaþvingunum
vegna árása þeirra á almenna borgara
í nágrannaríkinu Bosníu-Hersegóvínu.
Friðargæsla
Því fer fjarri að öll mál sem Öryggisráðið
fjallar um endi með refsiaðgerðum. Oftast lætur
það sér nægja að biðja þau
ríki sem eiga í stríði að samþykkja
vopnahlé eða að hefja friðarumleitanir. Ef það
dugar ekki til velur Öryggisráðið stundum að
senda sérstaka sáttasemjara eða alþjóðlegar
friðargæslusveitir á svæðið. Friðargæslusveitir
eru aldrei sendar inn á átakasvæði nema
með samþykki yfirvalda á því svæði
sem þær eiga að starfa á og þær
mega bara beita vopnum í sjálfsvörn. Meginhlutverk
friðargæslusveitanna er að halda stríðandi
fylkingum aðskildum og að fylgjast með að vopnahlé
sé haldið. Friðargæslusveitirnar hafa einnig
reynst vel í að vernda almenna borgara fyrir ofbeldi
og valdbeitingu auk þess sem þær eru líka
öflugar í ýmiss konar líknarstarfi.
Íslensk friðargæsla
Góður árangur af starfi Íslendinga í
friðargæslusveitum í Bosníu-Hersegóvínu
er stjórnvöldum hvatning til frekara starfs á
þessu sviði og sýnir svo ekki verður um villst
að Ísland getur ekki síður en aðrar þjóðir
lagt sitt af mörkum í þeim efnum. Friðargæslu-
og eftirlitsaðgerðir á vegum stofnunarinnar geta
gefið Íslendingum aukin tækifæri til að
senda sérhæfða liðsmenn á vettvang og
stuðlað þannig að friði og stöðugleika
víða um heim. Ísland hefur gerst áheyrnaraðili
að friðargæslunefnd Sameinuðu þjóðanna
með það fyrir augum að gerast fullgildur aðili
innan tíðar.
Fyrstu íslensku læknarnir og hjúkrunarfræðingarnir
fóru til starfa í friðargæslu í Bosníu-Hersegóvínu
á vegum íslenskra stjórnvalda árið
1994. Íslensku friðargæsluliðarnir voru fyrst
undir fána friðargæsluliðs SÞ í
fyrrverandi Júgóslavíu (UNPROFOR). Friðargæslusveitirnar
gerðu mikið gagn með því að halda átökum
í skefjum á mörgum svæðum og með
því að aðstoða við að koma mannúðaraðstoð
í framkvæmd. Síðar urðu íslensku
friðargæsluliðarnir hluti af eftirlitssveitum Atlantshafsbandalagsins
í landinu (IFOR/SFOR). Á vettvangi Atlantshafsbandalagsins
hafa íslensk stjórnvöld ávallt stutt samvinnu
bandalagsins og Sameinuðu þjóðanna um framkvæmd
ályktana öryggisráðsins varðandi Bosníu-Hersegóvínu.
Tveir íslenskir læknar og tveir hjúkrunarfræðingar
starfa nú þar í landi undir verkstjórn
breska hersins á grundvelli samnings milli íslenskra
og breskra stjórnvalda.
Rúmlega 2000 manna lögreglulið
er nú að störfum undir merkjum SÞ í
Bosníu-Hersegóvínu. Þrír íslenskir
lögreglumenn starfa þar í danskri lögreglusveit.
Þessar
upplýsingar eru fengnar af heimasíðu Utanríkisráðuneytisins
og þar getur þú lesið meira um friðargæslu.
Á síðari árum hafa Sameinuðu
þjóðirnar í vaxandi mæli sent árásarherlið
inn á átakasvæði til að viðhalda
lögum og reglum, eins og gerðist í til dæmis
í Kúveit, Sómalíu og Haíti. Í
ofannefndum dæmum hafði Öryggisráðið
samþykkt valdbeitingu og því tóku Sameinuðu
þjóðirnar virkan þátt í stríðsátökunum.
Sameinuðu þjóðirnar gátu hins vegar
ekki beitt árásarher í fyrrverandi Júgóslavíu
vegna þess að stórveldin (Bandaríkin og
Rússland) og önnur ríki studdu ólíka
þjóðernishópa. Tillaga um beina árás
á fyrrverandi Júgóslavíu, sem fæli
í sér stuðning við einn þjóðernishóp
en andstöðu gagnvart öðrum, hefði því
örugglega verið felld af einhverjum fastafulltrúa
Öryggisráðsins. Sameinuðu þjóðirnar
urðu því að láta sér nægja
að senda inn friðargæslusveitir. Þær urðu
vitni að því að sterkasti aðilinn, Serbar,
þvinguðu fram vilja sinn á orrustuvellinum.
|