Íbúafjöldi hefur líka mikil áhrif á stöðu hvers lands og möguleika þess í alheimssamfélaginu, en er samt ekki afgerandi. Gæði opinberrar þjónustu, sérstaklega í menntakerfinu, hefur meiri áhrif vegna þess að þar er lagður grunnurinn að allri þróun atvinnulífsins. Eins skiptir samgöngu- og samskiptakerfi og áhrifaríkt stjórnunarfyrirkomulag miklu máli.
Ríki sem býr við heilbrigt efnahagskerfi og stöðugleika í stjórnmálum styrkir stöðu sína í alþjóðlegu valdabaráttunni. Það sama á við um ríki sem hafa dugmikla leiðtoga sem jafnframt hafa breiðan stuðning meðal landsmanna. Þá styrkir það einnig stöðu ríkis ef ríkisstjórn þess ræður yfir öflugri utanríkisþjónustu. Það er nefnilega mjög mikilvægt fyrir ríkisstjórnir að hafa góða þekkingu á aðstæðum í öðrum löndum, áður en þær móta utanríkisstefnu sína.

Þegar eitt ríki vill koma skoðunum sínum á framfæri gagnvart öðrum þjóðum, notar það fyrst og fremst diplómatískar aðferðir. Með þessu er átt við að ríkið beitir sendiráðunum eða ræðismönnum sínum í öðrum löndum við að koma skoðunum sínum á framfæri eða ef það vill semja um lausn ákveðinna vandamála. Viðræðurnar fara fram á fundum þar sem fulltrúar beggja aðila eru staddir og eins koma til skrifleg skoðanaskipti á milli viðkomandi aðila. Viðræðurnar enda oft með samkomulagi milli málsaðila, til dæmis um viðskiptasamninga eða fiskveiðisamninga. Í mörgum tilfellum eiga viðræðurnar sér stað innan alþjóðlegra stofnanna, eins og til dæmis Evrópusambandsins eða Sameinuðu þjóðanna, en um báðar þessar stofnanir er fjallað annars staðar.