Margrét hefur mikið dálæti á Netinu, henni finnst það skemmtilegt og nytsamlegt. Stundum situr hún marga tíma á dag fyrir framan skjáinn og skoðar heimasíður fjölmiðla, fyrirtækja og einstaklinga. Skemmtilegast finnst henni að taka þátt í umræðum á Netinu og þannig hefur hún eignast fjölmarga vini erlendis, vini sem hún hefur aldrei séð en þekkir samt innstu leyndarmál þeirra.

Alheimsþorpið
Netið gefur þér möguleika á nánum samskiptum við fólk um allan heim og tilfinning fyrir landfræðilegri fjarlægt hverfur. Þér finnst þú vera hluti af alheimsþorpi vegna þess að þú færð þá tilfinningu að þekkja alla aðra sem þú ,,hittir" reglulega á Netinu (spjallrásinni) og ræðir við um allt milli himins og jarðar.

Aldrei fyrr hefur fólk getað miðlað upplýsingum og haft samskipti um langan veg á jafn auðveldan hátt. En eiga allir jafn auðvelt með að taka þátt í upplýsingabyltingunni? Svarið er nei. Hér á landi er fjöldi fólks sem ekki kann á þessa nýju tækni. Eins og áður hefur komið fram hafa margir áhyggjur af því að þessir einstaklingar verði útundan í samfélaginu. Enn ljósari verður munurinn ef við skoðum heiminn sem heild. Margir halda að fátækustu ríki verandar munu dragast aftur úr miðað við ríkari þjóðir heims.

Þótt Netið og Netnotkun hafi á örfáum árum vaxið hraðar en nokkuð annað fjarskiptakerfi hefur áður gert, er þróunin örust í ríkari löndum heims. Í fátækari löndum heims eru mörg vandamál sem koma í veg fyrir þátttöku til dæmis eru símakerfi lélegt og fáar símalínur, sérstaklega þegar komið er út fyrir þéttbýlustu svæði fátæku landanna. Annað vandamál er að rafmagn er oft dýrt og getur verið mjög óstöðugt í fátækum löndum, en það fer mjög illa með viðkvæman tæknibúnað og símakerfi. Einnig getur biðtími eftir símatengingum verið óhemjulangur, á Indlandi er ekki óalgengt að fólk þurfi að bíða í sjö ár eftir tengingu. Hvergi annars staðar í heiminum eru heldur seldar fleiri ritvélar (ekki rafmagns) en þar vegna óstöðugs rafmagns.

Enn eitt vandamál er að milljónir manna í fátækum löndum kunna ekki að lesa eða skrifa og eru þar með útilokaðir frá að nota upplýsingatæknina. Þessi hópur hefur ekki vanist tækni af þessari gerð, til dæmis hefur helmingur mannkyns aldrei hringt úr síma.

Veraldarvefurinn - Netið
Hugtakið veraldarvefur er skilgreint sem þéttofið net miðlara um allan heim sem veita í sameiningu aðgang að ógrynni upplýsinga á margmiðlunarformi þar sem texti, kyrrmyndir, hreyfimyndir og hljóð spila saman á heildstæðan hátt. Þessar upplýsingar er svo hægt að kynna sér á tölvu notanda með viðeigandi hugbúnaði (World Wide Web). Allir sem hafa aðgagn að tölvu, símalínu og mótaldi geta komist í bein tengsl við aðra sem eru á Netinu. Til eru ýmsar samskiptaleiðir fyrir Netverja (þá sem nota Netið). Algengasta samskiptaformið er líklega tölvupóstur, en þar geta menn meðal annars sent texta, forrit, myndir, hreyfimyndir og hljóð sín á milli. Þar fyrir utan eru til mörg þúsund fréttahópar (newsgroup) þar sem þú getur fylgst með og tekið þátt í umræðum um ólíklegustu málefni.

Heimild: Heimild: PricewaterhouseCoopers, 2000
http://brunnur.stjr.is/interpro/for/for.nsf/pages/wpp0181

UT - upplýsingatækni
UT er skammstöfun fyrir upplýsingatækni sem notuð er um upplýsingar sem birtast á rafrænu formi. Textavarpið er eitt dæmi af mörgum aðferðum til að birta rafrænar upplýsingar. Ef við höfum aðgang að tölvu sem Nettengd er einnig hægt að nota hana til að sækja rafrænar upplýsingar. Nettengdar tölvur eru mjög mikilvægar í allri upplýsingaleit. Á Netinu er víða að finna upplýsingar, sem nýtast við ýmis konar verkefnavinnu. Þú getur til dæmis byrjað á að heimsækja heimasíðu Skólatorgsins, skolatorg.is.

Á fjölmörgum íslenskum og innlendum heimasíðum er hægt að finna áhugaverðar og góðar upplýsingar, en það finnst líka jafn mikið af heimasíðum sem eru lélegar og innihalda villandi eða rangar upplýsingar. Heimasíður margra einstaklinga eru ekki eins traustar og heimasíður þekktra fyrirtækja eða stofnana og nýtast því illa sem heimildir. Heimasíða Hagstofu Íslands hagstofa.is er dæmi um góða síðu þar sem þú getur fundið gagnlegar upplýsingar um land og þjóð (oftast sem töflur eða línurit).

Þú getur líka skoðað heimasíður íslenskra skóla en margir hafa lagt mikla vinnu í að safna saman gagnlegum upplýsingum um margvísleg áhugaverð efni.

Þegar bandaríski herinn fékk hugmynd
Á tímum kalda stríðsins - þegar Bandaríkin og Sovétríkin börðust um völd og áhrif eftir seinni heimsstyrjöld - hóf bandaríski herinn að þróa netkerfi sem síðar varð að Internetinu.
Hugmyndin að baki Netinu var að búa til samskiptakerfi sem myndi ekki hrynja ef kæmi til kjarnorkuárásar. Allir hlutar samskiptakerfisins áttu að vera jafn mikilvægir, þannig að þó einhver hluti kerfisins myndi eyðileggjast væru hinir hlutarnir enn starfhæfir.
Lýsingin hér að ofan á einnig við um Netið eins og það er nú, sem hægt er að líkja við risavaxið fiskinet: Það eyðileggst ekki þótt einn möskvinn skemmist.
Enginn einn einstaklingur eða fyrirtæki geta stýrt Netinu og þess vegna er nánast útilokað að segja nákvæmlega til um hversu margir nota það. Nú er talið að notendurnir séu á milli 150-200 milljónir manna um allan heim.