MENNTUN OG VINNUMARKAÐUR

1. Veldu tvær af námsbrautunum sem fjallað er um í samnefndum kafla í bókinni. Skoðaðu hvaða námsgreinar eru kenndar á þeim. Athugaðu skólanámskrá tveggja til þriggja framhaldsskóla (sjá krækjusafn) og skoðaðu námsframboð, lengd og inntak námsbrautanna tveggja sem þú valdir og skiptingu námsgreina á námsannir eða námsár.

2. Veldu þrjár atvinnugreinar sem þú gætir hugsað þér að starfa við. Skoðaðu atvinnuauglýsingar í dagblöðum eða á Netinu (sjá krækjusafn) og athugaðu hvort það séu einhver laus störf í þeim greinum sem þú valdir. Búðu til lista yfir þær kröfur sem atvinnurekandi setur sem skilyrði fyrir þá sem sækja um stöðurnar.

3. Veldu fimm ólíkar starfsgreinar og leitaðu upplýsinga um hvað þú hefðir í laun sem byrjandi í hverju starfi.
a) Hvernig má útskýra launamuninn á milli þessara fimm starfa?
b) Veldu lægst launaða starfið og finndu þrenn rök fyrir af hverju kaupið ætti að vera hærra í því starfi eða þrenn rök fyrir að launin séu hæfileg.

4. Hvað skiptir þig mestu máli - hvað er mikilvægast þegar þú velur þér starf? Notaðu tölustafina 1-18 eftir því hversu mikilvæg eftirfarandi atriði eru. Einn þýðir mikilvægast en 18 þýðingarminnst.

5. Flokkið niðurstöður alls bekkjarins úr spurningu 4 tölfræðilega og setjið upp í línurit. Hægt er að nota forritið Spurnir eða Excel. Skoðið hvort komi fram kynskiptur munur á forgangsatriðum. Ræðið niðurstöðurnar.

6. Notaðu forgangsröðunina þína og reyndu að finna út hvers konar starf henti þér best miðað við niðurstöður. Dæmi: Kennarar hafa langt sumarfrí, hjúkrunar-fræðingar vinna oft vaktavinnu o.s.frv.

7. Ræðið eftirfarandi fullyrðingu: „Ungir strákar vilja heldur vera atvinnulausir en að vinna við umönnunarstörf (t.d. á leikskólum eða elliheimilum)“.

8. Skoðaðu menntunarmöguleika í öðrum löndum. Veldu þér fyrst land sem þú vilt búa í og skoðaðu síðan mismunandi skóla í því landi á Netinu (sjá krækjusafn).

9. Skoðaðu töfluna í námsbókinni um fjölda nemenda í framhaldsskólum á nokkrum námsbrautum eftir kyni árið 1999.
a) Á hvaða brautum er mestur kynjamunur?
b) Búðu til lista þar sem þú setur upp allar hugsanlegar ástæður fyrir þessum mun.
c) Hvaða ástæður af þeim sem þú hefur skrifað upp finnst þér mikilvægastar?
d) Nefndu nokkur ráð um hvernig hægt sé að breyta þessum kynbundna mun og ræðið síðan niðurstöðurnar í bekknum.

10. Einstaklingsverkefni. Finndu rök fyrir því af hverju það er mikilvægt fyrir nemendur að öðlast þekkingu á samfélögum og menningu, að þeir þjálfist í tungumálum og samskiptaháttum og geti beitt gagnrýnni hugsun.

11. Hópverkefni. Ræðið eftirfarandi fullyrðingu: „Ég er á móti ævilangri menntun, enda ætti menntun sem maður hefur þegar tekið að vera nægjanleg. Þessi umræða um stöðuga símenntun og endurmenntun er mjög yfirdrifin.“

12. Bylting í menntun er bara rétt að byrja. Framboð menntunar hefur verið að stóraukast og sífellt fleiri hafa möguleika á að bæta við sig menntun. Fólk hefur ekki bara möguleika - heldur krefst atvinnumarkaðurinn þess að það afli sér viðbótarmenntunar. Aukin menntun hefur mjög góð áhrif á lífsgæði fólks og afkastagetu samfélagsins.

a) ræðið hvað felst í menntunarbyltingu og hvort hún sé bara af hinu góða.
b) Hvernig getur menntunarbylting aukið afköstin í samfélaginu?

13. Stýrir tækniþróunin okkur eða stýrum við tækniþróuninni?

14. Hugmyndir að verkefnavinnu:
a) Karla- og kvennastörf nú á dögum.
b) Hvaða starfsmöguleikar fylgja vali á brautum?
c) Hvað felst í því að vera lærlingur?
d) Af hverju hafa sumar starfgreinar breyst gríðarlega mikið (t.d. úrsmiður, gullsmiður, prentari, kennari)?
e) Erfast starfsgreinar?
f) Hvaða breytingar hafa átt sér stað í þinni heimabyggð síðastliðin 20 ár?