71 | Framhaldsskólinn 2890 | Menntamálastofnun 2023 | Sjúkást – sambandsrófið Þrep: Tímalengd: Hugtök tengd verkefninu: 1. þrep 30–90 mín. Samþykki, mörk, ofbeldi í nánum samböndum, stafrænt ofbeldi Undirbúningur: Kynntu þér heimsíðu forvarnaverkefnis Stígamóta: www.sjukast.is, sérstaklega sambandsrófið (sem sýnir muninn á heilbrigðum, óheilbrigðum og ofbeldisfullum samböndum) og hin stuttu myndbönd undir herferðum áranna 2018, 2021 og 2023. Framkvæmd: Kennari sýnir sambandsrófið uppi á töflu og fer yfir hvert hugtak svo tryggt sé að nemendur skilji þau öll. Myndbönd herferðanna 2018, 2021 og 2023 eru sýnd. Hópurinn tekur stutta umræðu saman og nemendum er svo skipt í 2-4 manna hópa (gott að huga að fjölbreyttri kynjasamsetningu). Sambandsrófið má nýta á ólíka vegu, t.d.: ● Hóparnir ræða um heilbrigð og óheilbrigð sambönd og jafnvel hvernig þau sjá fyrir sér draumasambandið sitt. Síðan skrifa þau dæmisögu þar sem fram koma einkenni óheilbrigðra samskipta eða ofbeldis í sambandi. Að lokum lesa hópar upp sína dæmisögu og nemendur ræða saman um þær. o Komu sömu dæmin fram hjá mörgum hópum? Eitthvað sem var aldrei nefnt? Hvað finnst þeim augljóst ofbeldi og hvað er flóknara? Hvað finnst þeim alvarlegast? o Spurðu hvort þau telji sögurnar á heimasíðunni vera raunverulegar, hvort þau þekki jafnvel slík dæmi (gæta nafnleysis) og hvort þau haldi að ofbeldi sé algengt í samböndum hjá unglingum og hvers vegna þá. ● Hver hópur fær eina „sambandstegund“ til þess að vinna með (þar sem tegundirnar eru þrjár eru nokkrir hópar með sama viðfangsefnið). o Hver hópur fær það hlutverk að búa til örsögu með samskiptum þar sem einkenni sambandsins skv. sambandsrófinu koma fram. Kynning fer fram með lestri örsögunnar og rökstuðningi í kjölfarið á því hvernig einkennin koma fram. o Hver hópur fær það hlutverk að finna vinsæla kvikmynd þar sem bera má kennsl á einkenni sambandsins sem fjallað er um. Kynning fer fram með því að segja stuttlega frá kvikmyndinni (hægt er að sýna „trailer“ í leiðinni) og ræða dæmi úr myndinni sem sýna ákveðin einkenni úr sambandsrófinu.
RkJQdWJsaXNoZXIy MjIxNzc=