3 Til kennara Kennsluleiðbeiningum þessum er ætlað að gefa yfirlit yfir hvernig vinna má með kennsluefnið Yes we can 6. Efnið samanstendur af nemendabók, verkefnabók og stafrænu efni á vef. Í efninu er boðið upp á fjölbreytta texta hvað varðar efnisval, lengd og þyngd. Nemendur takast á við úrval munnlegra og skriflegra verkefna sem reyna á orðaforða, mál og málnotkun auk sjálfsmats. Endurtekning og gagnsæ orð Í Yes we can 6 er, sem fyrr, lögð áhersla á endurtekningu orða og setningamynda. Unnið er markvisst með orðaforða hvers kafla og athygli vakin á gagnsæjum orðum, þ.e. orðum sem eru lík á íslensku og ensku, þar sem við á. Nemendum gefast stöðugt tækifæri til að tjá sig munnlega og skriflega og um leið verða þau meðvitaðri um hvaða hlustunar- og lestraraðferðir nýtast best við námið. Vangaveltur um eigin námstækni eru gagnlegur liður í sjálfsmati. Nærumhverfið og heimsmálin Áhersla er lögð á viðfangsefni sem standa nemendum nærri, svo sem íþróttir, menningu, listir, ferðalög og fleira. Námsefnið gefur innsýn í hvað börn og unglingar í enskumælandi löndum taka sér fyrir hendur í og utan skóla. Í hæfniviðmiðum aðalnámskrár er menningarlæsi eitt af áhersluatriðum í tungumálakennslu. Með umfjöllun um aðrar þjóðir og menningarheima opnast gáttir að fjölbreyttri menningu, aukinni víðsýni, skilningi, umburðarlyndi og virðingu gagnvart ólíkum háttum. Þannig má einnig stuðla að auknum skilningi á eigin menningu. Mikilvægt er einnig að vekja nemendur til umhugsunar um hvers vegna enska er alheimstungumál og hvers vegna það er gagnlegt að tileinka sér hana. Málfræði Í Yes we can er unnið með málfræði út frá innihaldi textanna. Hver kafli hefst á kynningu á málfræðiáherslum kaflans sem farið er yfir í sameiningu. Í kjölfarið vinna nemendur sjálfstætt að verkefnum bæði í verkefnabók og á vef. Málfræðiáherslur hvers kafla koma svo fyrir jafnt og þétt í kaflanum, þar sem nemendur mæta þeim, og vinna með, í eðlilegu samhengi. Með dæmum og verkefnum komast nemendur í kynni við orð og setningamyndir sem þeir mæta svo síðar í textum og verkefnum kaflans. Í námsmatshlutanum, Let´s go er metið hvort nemandi hafi náð að tileinka sér málfræðihluta kaflans. Námsmat Nemendur vinna markvisst að mati á eigin námi og eru hvattir til að íhuga og ræða námsaðferðir og áskoranir sem þeir mæta í textum og verkefnum. Leiðsagnarmat fer fram samhliða náminu sjálfu og er liður í vinnu nemenda með skapandi verkefnum, matssíðum, samvinnunámi, aukaverkefnum og samtölum í kennslustundum. Námsefnið býður upp á skýrt samhengi milli náms, kennslu og námsmats og lagt er upp með að námsmatið sé leiðbeindandi, hvetjandi og upplýsandi. Staða nemandans er metin jafnóðum í samvinnu nemanda og kennara og út frá henni metið hvernig næstu skref í náminu skulu vera. Kennsluleiðbeiningar Kennsluleiðbeiningarnar gefa yfirsýn yfir innihald hvers kafla, þ.m.t. orð og setningagerð, áherslur í töluðu máli og framburðarreglur, auk yfirlits yfir hvaða hæfniviðmiðum er unnið að hverju sinni. Efni kaflans er kynnt og tillögur um hvernig vinna má með hvert viðgangsefni fyrir sig. Tengslum nemendabókar og verkefnabókar eru gerð skil ásamt hlustunarefni og tillögum að heimanámsverkefnum.
RkJQdWJsaXNoZXIy MjIxNzc=