20 Hendur (Nemendabók bls. 16) Við hvers konar tónlistariðkun, að söng undanskildum, leika hendurnar lykilhlutverk. Þær notum við til að leika á hljóðfærin okkar hvort sem við sláum á píanónótur, strjúkum gítarstrengi, berjum trommur eða breytum loftstreymi blásturshljóðfæris með fingrunum. En hendurnar má að sjálfsögðu nota sem hljóðfæri og þannig hafa þær sjálfsagt verið notaðar frá upphafi tíða. Í þessum kafla er unnið með hendurnar sem hljóðgjafa á skapandi hátt og nemendur hvattir til að búa til ný og óvenjuleg hljóð með þeim. Fingraþula Margar skemmtilegar fingraþulur eru til á íslensku sem foreldrar hafa kennt börnum sínum í áranna rás. Fingraþulur eru oftast einhvers konar saga þar sem nöfn fingranna koma stundum fyrir. Ólíkir fingur eru þannig notaðir til að auðvelda barninu að læra þuluna. Á bls. 16 í nemendabók er ein slík. Farið með þuluna með nemendum og spyrjið hvort þeir þekki fleiri fingraþulur. Einhver dæmi eru til um að fingraþulur séu sungnar en oftast er notuð ákveðin hrynjandi. Það er því kjörið að ræða við nemendur hvort þulur eigi eitthvað skylt við rapptónlist. Í fyrstu finnst líklega flestum himinn og haf á milli en þegar nánar er athugað byggist hvortveggja á að fara með rímaðan texta í ákveðinni hrynjandi. • Spyrjið nemendur hvort einhver treysti sér til að rappa fingraþuluna í nemendabók. • Ef ekki má gjarnan skipta þulunni á milli nokkurra nemenda. • Aðrir í hópnum geta búið til undirspil með kroppaklappi eða með því að „bítboxa“ (búa til trommuhljóð með munninum t.d. pumm, tss, pumm, pumm, tss). • Í rapplögum er algengt að erindi séu röppuð en viðlögin sungin. Það getur því verið skemmtilegt að semja laglínu fyrir seinni hluta vísunnar sem nokkurs konar viðlag við rappaðan fyrrihlutann.
RkJQdWJsaXNoZXIy MjIxNzc=