4 Inngangur Það þarf heilt samfélag til að ala upp barn Orðatiltækið „ Það þarf heilt samfélag til að ala upp barn“ undirstrikar þá grundvallarhugmynd að þroski barna, þar með talin þróun félagsfærni, eigi sér ekki stað í einangrun heldur í samspili við umhverfi þeirra. Félagsfærni barna mótast í daglegum samskiptum við jafningja og fullorðna, þar sem þau læra að tjá tilfinningar, setja mörk, sýna samkennd og leysa ágreining. Þessi færni þróast smám saman með æfingu, endurgjöf og fyrirmyndum í fjölbreyttum félagslegum aðstæðum. Markviss félagsfærniþjálfun er mikilvæg forvörn gegn einelti og félagslegum vandamálum sem geta komið upp þegar slíka færni skortir. Því er nauðsynlegt að þjálfa félagsfærni á réttan hátt og hefja þjálfun strax á fyrstu stigum grunnskólans. Í gegnum lífið eigum við öll í margvíslegum samskiptum við annað fólk. Flest okkar erum sammála um að jákvæð samskipti séu forsenda þess að okkur farnist vel, bæði í leik og starfi. Sum börn eiga þó í erfiðleikum með slík samskipti, sem getur valdið mikilli vanlíðan og jafnvel leitt til þess að þau einangrist. Hugmyndabankinn er ætlaður kennurum og starfsfólki í skóla- og frístundastarfi til að þjálfa félagsfærni barna. Gert er ráð fyrir að unnið sé í hópum þar sem slík samvinna skilar jafningjaáhrifum — en samskipti jafningja hvetja meðal annars til vaxtar í félagsfærni.
RkJQdWJsaXNoZXIy MjIxNzc=