151 Suðurskautslandið Suðurskautslandið skiptist í tvö ólík svæði umTransantarktíkafjöll, Suðurskautsland hið minna sem er þyrping fjöllóttra eyja þakin samfelldum jökli allt að 3,5 km á þykkt og Suðurskautsland hið meira sem er háslétta með allt að 4,5 km þykkum ís. Í báðum tilvikum liggur botn jökulsins undir sjávarmáli. Vestur úr Suðurskautslandinu, mót Suður-Ameríku, gengur Suðurskautsskagi (Antarktíkuskagi). Margir gríðarstórir skriðjöklar ganga úr Suðurskautsjöklinum og kelfa í sjó fram, þ.e. þegar stór ísstykki brotna af skriðjöklinum, jafnvel stórir borgarísjakar sem fljóta upp. Þá taka hafstraumar við sem geta borið þá um langan veg. Á Suðurskautsjöklinum má líka finna stærsta skriðjökul í heimi, Lambertjökul, sem er um 40 km breiður og yfir 400 km langur. Tveir stórir flóar eða höf ganga inn í Suðurskautslandið, Rosshaf og Weddelhaf. Þar hafa myndast miklar íshellur sem fljóta á höfunum. Rossíshellan, stærsta íshellan á Suðurskautslandinu, er á stærð við Frakkland. Talið er að tæpan þriðjung af öllum ís á Suðurskautslandinu sé að finna í Rossíshellunni. Ronneíshellan er álíka stór og gengur út í Weddelhaf. Á Suðurskautslandinu er syðsta eldfjallið á jörðinni, Erebus. Frá því að menn fóru að fylgjast með fjallinu hefur eldvirkni þar verið mikil. Í toppgíg fjallsins hefur hrauntjörn kraumað í mörg ár. KELFA Ef skriðjökull gengur í sjó eða vatn er talað um að hann kelfi, þá brotnar af jaðri hans og ísjakar fljóta í burtu.
RkJQdWJsaXNoZXIy MjIxNzc=