Maðurinn hugur og heilsa

70 Tíðir Þegar stúlka verður kynþroska býr líkaminn hana undir að ganga með barn. Það skiptir ekki máli hvort hún vill eignast barn eða ekki. Líkaminn fer sínu fram! Þetta gerist Í eggjastokkum stelpunnar eru mörg egg að myndast. Einu sinni í mánuði þroskast eitt þeirra og losnar frá eggjastokknum. Það kallast egglos. Eggið leggur svo af stað í átt að leginu. Á meðan tekur legið breytingum sem gerir því kleift að taka við egginu. Veggir legsins þykkna og fyllast af æðum. Ef eggið frjóvgast af sáðfrumu úr strák á leiðinni til legsins festist það við legvegginn. Stelpan er þá orðin barnshafandi (þunguð eða ólétt). En langflest egg frjóvgast ekki og festast þá ekki í legið. Þá er engin þörf fyrir þykkan vegg þess og blóðið í honum. Hann losnar einfaldlega og blóðið rennur út. Þessar blæðingar köllum við tíðablæðingar eða bara tíðir eða blæðingar. Engar tvær eru eins Nokkrar stelpur fá fyrstu tíðirnar átta ára. Svo eru aðrar sem eru orðnar 17 ára þegar blæðingarnar hefjast. Í upphafi eru tíðirnar oft óreglulegar. Þær koma og fara með mislöngu millibili. Stundum eru miklar blæðingar, þess á milli kemur kannski bara lítill brúnn blettur í buxurnar. Kannski líða stundum tveir mánuðir á milli tíða, en í önnur skipti aðeins fáeinir dagar. En á tveimur árum eða svo nær líkaminn tökum á tíðunum. Eftir það er algengt að 28 dagar líði á milli upphafs blæðinga, sem standa svo í fjóra til fimm daga. Rauða hættan Að hugsa sér! Persóna sem blóð rennur úr einu sinni í mánuði? Eitthvað hlýtur að vera bogið við það. SVEI! Þannig hugsuðu margir fyrir langalöngu. Þá kunnu menn enga skýringu á tíðablæðingunum. Karlmenn töldu að meðan á þeim stóð væri hættulegt að koma nærri konum. Rómverjinn Gajus Pliníus eldri, sem lifði á dögum Jesú, hélt til dæmis að maður gæti dottið dauður niður á stundinni ef kona með tíðablæðingar biti hann.