Ég og sjálfsmyndin – Kennsluleiðbeiningar | © Sigríður Steinunn Karlsdóttir | Menntamálastofnun 2022 | 2896 | 43 Koma inn og teygja á stóru vöðvum líkamans – setja höfuð niður – láta höfuðið hanga. Fá blóðrásina í gang og hrista sig aðeins til. Þeir leggjast síðan aftur niður og sjá hvort innri líkamleg líðan hefur breyst. Kannski hefur verkur í hné aukist eða minnkað? Kannski er komið lítið kitl í fingurna. Verkefni: Að faðma tré Nemendur og kennarar finna stað þar sem eru tré. Þeir taka líkamsskönnun rétt áður en faðmað er tréð. Hvernig líður þér í líkamanum núna? Þeir faðma tré í 2-3 mínútur og eiga að skanna líkamann á meðan og skrá niður líðan eftir að hafa verið í tengingu við náttúruna. Svefn og svefnvenjur Markmið: Að nemendur átti sig á mikilvægi svefns og góðra svefnvenja. Hvaða atriði eru árangursrík fyrir svefn og hvaða atriði draga úr svefngæðum. Fróðleikur fyrir kennarann: Svefn er mikilvægur þegar kemur að andlegri og líkamlegri heilsu. Gæði svefns skipta ekki síður máli en lengd svefnsins. Góður svefn hjálpar fólki að vinna úr daglegu áreiti. Það er mikilvægt að huga vel að svefninum þegar við erum undir miklu álagi. Það skiptir höfuðmáli að auka gæði svefns. Svefn skiptist í nokkur stig sem við flöktum á milli þegar við sofum: léttan svefn, djúpan svefn og draumsvefn. Við skiptum á milli þessara stiga nokkrum sinnum á nóttu en sá tími sem við dveljum í hverju svefnstigi eru í beinu samhengi við það hversu endurnærandi svefninn er og líka hversu úthvíld við erum þegar við vöknum. Djúpsvefn er sá hluti svefns sem er mest endurnærandi og á sér stað að mestu leyti fyrri hluta nætur sem gerir tímann sem við leggjumst til hvílu mjög mikilvægan. Því fyrr sem við förum að sofa því líklegra er að við náum lengri tíma af djúpum svefni, sem bætir heildargæði svefnsins. Þannig aukast líkurnar á því að við vöknum úthvíld. Margir hafa sjálfsagt þurft að fórna svefninum til þess að reyna að vinna upp tíma í vinnu, námi eða daglegu lífi en slíkt kemur fljótt niður á líðan okkar og heilsu. Þó svo að mælt sé með að hver og einn fái að minnsta kosti 7 klst. af svefni á nóttu. Kveikja: Skoðið ráðleggingarnar um betri svefn á bls. 41 – sem eru í hvítu hringjunum. Verkefni: Svefninn minn Teiknaðu mynd eða myndasögu sem sýnir þínar svefnvenjur. Þú getur líka lýst þeim skriflega eða tekið upp stutta frásögn. Umræður: • Hafið þið einhvern tíma átt erfitt með að sofna? Hvað gerið þið þá? • Hvað teljið þið að hægt sé að gera til að sofa betur?
RkJQdWJsaXNoZXIy MjIxNzc=