69 Örugg saman – upplýsingar fyrir foreldra Öryggi unglinga í samböndum Ofbeldi eða kúgun í samböndum er alvarlegt mál sem getur snert hvaða ungling sem er. Bæði strákar og stelpur geta verið þolendur ofbeldis og bæði strákar og stelpur geta verið gerendur ofbeldis. Í bandarískum rannsóknum hefur komið fram að á bilinu 10-38% nemenda á aldrinum 14-18 ára hafa orðið fyrir ofbeldi í sambandi eða á stefnumóti. Íslensk rannsókn sem gerð var í framhaldsskóla leiddi í ljós að 9,4% nema á aldrinum 16-24 ára svöruðu því játandi að hafa verið sannfærðir, þvingaðir eða neyddir af einhverjum til að taka þátt í kynferðislegum athöfnum. Í um 27% tilfella var gerandinn kærasta eða kærasti og í um 55% tilfella var gerandinn vinur eða kunningi. Í sömu rannsókn sögðust 31% hafa stundað kynlíf og fundið til eftirsjár daginn eftir. Hvað er ofbeldi í samböndum? Ofbeldi eða kúgun í samböndum er hegðun sem er notuð til að stjórna eða ráðskast með hinn aðilann. Þessi hegðun getur verið: • Líkamlegt ofbeldi eins og að slá, hrista, henda hlutum, neyða til kynferðisathafna, taka hálstaki og nota einhvers konar vopn. • Andlegt ofbeldi eins og að gera lítið úr skoðunum eða gildum hins aðilans, einangra viðkomandi, sýna óviðeigandi reiði, lítilsvirða viðkomandi og hóta að meiða sjálfan sig eða aðra. Foreldrar gegna mikilvægu hlutverki við að koma í veg fyrir að unglingurinn þeirra verði fyrir eða beiti ofbeldi í samskiptum eða samböndum, og við að hjálpa unglingnum að komast úr ofbeldisfullu sambandi.
RkJQdWJsaXNoZXIy MjIxNzc=