Um Krít   Hlusta á lestur Pása Hætta lestri
Krít er stærsta gríska eyjan og sú fimmta stærsta í Miðjarðarhafinu. Krít er aftur á móti önnur stærsta eyjan í Austur-Miðjarðarhafinu. Eyjan er mjög fjöllótt og er um 8.336 ferkílómetrar og 260 kílómetra löng (Crete. 2008). Náttúrufegurð er víða mikil og stórskorin.

Loftslag er milt og þægilegt. Sumarið er langt, frá því um miðjan apríl og út október og veturinn er eins og vor á Íslandi. Helstu tekjulindir eyjarskeggja eru landbúnaður og ferðaþjónusta.

Höfuðborgin heitir Heraklion eða Iraklio á grísku og þar búa um 151.000 íbúar en alls eru Krítverjar um 630.000 (Introduction to Crete). Vestan Heraklion eru strandbæirnir Rethymon og Chania og í austri eru Agios Nikolaos og Sitia.

Sumir kunna ef til vill að þekkja Rethymon og Chania en þessir staðir hafa verið vinsælir áfangastaðir sólþyrstra Íslendinga í gegnum árin.

Vísbendingar um mannavist á Krít má rekja aftur til nýsteinaldar eða um 6000-2600 f. Kr. Krít á sér því afar langa og forna sögu og gegnir einnig mikilvægu hlutverki í grískri goðafræði og sagnir herma að æðsti guðinn Seifur hafi fæðst á eyjunni.

Seifur átt þrjá syni með gyðjunni Evrópu en einn af þeim var Mínos konungur á Krít sem bjó í höllinni í Knossos.