Stjörnumerkin (sjá bls. 94 í Kortabók Námsgagnastofnunar)
Himintunglin hafa heillað mannkynið frá örófi alda.
Með því að tengja stjörnurnar með ímynduðum línum á himinhvolfinu sá fólk út alls konar myndir eða merki.
Myndirnar fengu heiti eins og höggormurinn, steingeitin, ljónið, myndhöggvarinn og svo framvegis.Tólf elstu merkin könnumst við einkar vel við.
Merkin tengjast ákveðnum tímabilum ársins.
Þannig var sporðdrekinn ríkjandi merki frá 23. október til 21. nóvember.Hvert er stjörnumerkið þitt?
Hvernig lítur það út?
Getur þú fundið stjörnumerkið þitt og stjörnuspá í tímariti eða dagblaði?Þið getið búið til stjörnumerki og varpað þeim upp á vegg:
- Takið stjörnumerki í gegn á þunnan pappír.
- Leggið þunna pappírinn á karton þannig að myndin leggist að kartoninu. Athugið að kartonið þarf að vera það stórt að það hylji ljósflötinn á myndvarpa.
- Farið ofan í stjörnurnar sem vonandi sjást sæmilega í gegnum þunna pappírinn – þá smitast blýið yfir á kartonið.
- Gerið nú göt í kartonið með misgrófum nálum og nöglum eftir því sem við á þar sem stjörnurnar eru.
- Leggið kartonið á myndvarpa þannig að það
hylji ljósflötinn, myrkvið stofuna og kveikið á
myndvarpanum.
Stjörnumerkið birtist á veggnum!
(© 2002 Sólrún Harðardóttir)