MIÐSTÖÐ MENNTUNAR OG SKÓLAÞJÓNUSTU 2024 | 8 | 2. Skólagátt Skólar hafa aðgengi að lesfimi- og stuðningsprófunum í gegnum vefgáttina Skólagátt en gáttin hýsir jafnframt og vinnur úr gögnum sem verða til við innslátt á niðurstöðum. Við upphaf skólaárs þurfa skólastjórar að skrá bekki sína í Skólagátt og velja þau próf sem leggja á fyrir árgangana þegar opnað er fyrir þau. Einungis skólastjórnendur, kennarar og aðilar innan Miðstöðvar menntunar og skólaþjónustu hafa aðgang að niðurstöðum nemenda í gegnum Skólagátt en skólastjórar ákveða jafnframt hverjir aðrir hafa aðgang að niðurstöðum skólans, s.s. kennsluráðgjafar eða forstöðumenn skólaskrifstofa. Hér er að finna nánari leiðbeiningar um notkun Skólagáttar en starfsfólk miðstöðvarinnar er jafnframt reiðubúið að aðstoða ef þörf krefur. 2.1. Tímarammi Lesfimi- og stuðningsprófin eru opin frá fyrsta degi fyrirlagnarmánaðar til miðnættis síðasta dags sama mánaðar eða 1.–30. september, 1.–31. janúar og 1.–31. maí. Það er á ábyrgð umsjónarkennara, eða þess sem leggur prófin fyrir, að skrá inn niðurstöður innan þess tímaramma sem prófin eru opin. Aðeins er hægt að skrá inn niðurstöður á meðan prófin eru opin og lokast því fyrir innskráningu á miðnætti síðasta dag fyrirlagnarmánaðar, þ.e. 30. september, 31. janúar og 31. maí. Ekki er hægt að skrá inn nýjar niðurstöður eftir lokun en hægt er að lagfæra mistök í skráningu ef haft er samband við miðstöðina. 2.2. Aðgangur kennara Skólastjóri sér um að stýra aðgengi kennara í Skólagátt og þegar aðgangur liggur fyrir skráir kennari sig inn í Skólagátt með rafrænum skilríkjum og hefur þá aðgang að sínum bekk/bekkjum. Með því að smella á próf sem leggja á fyrir kemst kennari á síðu sem inniheldur leiðbeiningar og prófgögn fyrir fyrirlögnina ásamt innsláttarsvæði fyrir niðurstöður. 2.3. Prófgögn í Skólagátt Undir hverju prófi (þ.e. lesfimi, orðleysulestri og sjónrænum orðaforða) má finna upplýsingar um prófin, nauðsynleg prófgögn, fyrirmæli og upplýsingar um hvernig skrá skal niðurstöður nemenda að prófi loknu. Prófgögnin eru aðgengileg í Skólagátt á því tímabili sem prófin eru opin. Kennari þarf að vera búinn að prenta út nauðsynleg prófgögn áður en fyrirlögn prófanna hefst. Nánari upplýsingar um hvernig nálgast má gögnin er að finna í umfjöllun um hvert próf fyrir sig.
RkJQdWJsaXNoZXIy MjIxNzc=