Um víða veröld - Jörðin

23 Uppbygging jarðar Á þessum stöðum myndast djúphafsrennur á hafsbotni en á landi rís brún meginlandsflekans og eldvirkur fjallgarður verður til. Þegar tveir meginlandsflekar mætast veldur áreksturinn því að fellingafjöll verða til eins og Himalajafjöll. Á hjáreksbeltum er rekstefna flekanna samsíða, ýmist í gagnstæðar áttir eða í sömu átt og þá er hvor á sínum rekhraða. Flekarnir stækka hvorki né minnka í þessu ferli. Bergtegundir Steindir eða steintegundir eru hinar náttúrulegu byggingareiningar allra bergtegunda á jörðinni. Bergtegundir eru flokkaðar eftir því hvaða stein­ tegundir þær hafa að geyma. Jarðskorpan er gerð úr bergtegundum sem venja er að skipta í þrjá flokka eftir uppruna sínum. Flokkarnir nefnast storkuberg , setberg og myndbreytt berg . Jarðskorpan er að langstærstum hluta úr storkubergi. Setberg og myndbreytt berg verða til við veðrun, rof og ummyndun. Hin eilífa hringrás steintegunda. Storkuberg myndast á yfirborði við kólnun bráðinnar bergkviku. Ef bergkvikan storknar neðan­ jarðar myndast stórkristallað djúpberg. Myndbreytt berg verður til við ummyndun ólíkra bergtegunda af völdum hita og þrýstings. Setberg er berg sem veðrun og rof hafa unnið á og flutt þangað sem setið sest í lög og þjappast með tímanum.