10 • Þegar allir hafa lært taktana er hægt að skipta nemendum í tvo til fjóra hópa, allt eftir því hvað þið treystið þeim til að blanda saman mörgum töktum. • Gott er að nota taktorðin til að byrja með en sleppa þeim svo þannig að aðeins kroppaklappið hljómi. • Þegar kroppaklapp hópanna er farið að hljóma vel saman skuluð þið láta einn hópinn syngja lagið í stað þess að gera kroppaklappið. • Afhendið takthljóðfærin og látið nemendur leika takta kroppaklappsins. • Nú skuluð þið bæta stafspilunum við. Ef nægilega mörg tréspil eru til staðar svo allir geti spilað er ágætt að leggja takthljóðfærin til hliðar og kenna öllum annað eða bæði þrástefin. Ef ekki eru nægilega mörg tréspil má láta helming nemenda fá takthljóðfæri í staðinn. • Kennið nú þrástefin fyrir sópran og alt tréspil. • Látið nemendur spila fyrsta takt þrástefsins nokkrum sinnum áður en farið er í næsta takt. Hvert þrástef er í rauninni brotinn hljómur, fyrst C-dúr, svo d-moll, þá G-dúr og að lokum aftur C-dúr. Ágætt er að útskýra þetta fyrir nemendum því þá er auðvelt að kalla upp tóninn sem hljómurinn heitir eftir þegar hann kemur fyrir í laginu. • Þegar búið er að kenna og æfa annað þrástefið er gott að spila það með takthljóðfærunum. • Gerið svo eins með hitt þrástefið og loks er óhætt að blanda öllum hljóðfærum saman ásamt söngnum. Skrefinu lengra Þegar öll hljóðfærin eru farin að hljóma vel saman, má bæta við spuna á stafspil. Bæði er hægt að nota C-dúr tónstigann og C-pentaton tónstigann með undirspilinu. Látið þá öll hljóðfærin nema spunahljóðfærið, spila veikar svo spuninn njóti sín. Eins gæti komið vel út að láta aðeins tvo hljóðfærahópa leika undir spunann, t.d. alt tréspil og hristu, svo ekki sé of margt í gangi í einu. Gjarnan má benda á hálfnótu þögnina sem er í seinni hluta allra takta hjá tréspilunum. Í þögninni er tilvalið að spinna. Gjarnan má segja frá því að hér sé um að ræða spurningu – svar, víxlsöng sem fjallað er um í næsta kafla.
RkJQdWJsaXNoZXIy MjIxNzc=