Töfraskinna

91 Dagblaðið Vísir, 5. nóvember 1993 Dularfullir atburðir og sterkir straumar frá jöklinum segir Skúli Alexandersson, fyrrverandi alþingismaður á Hellissandi. „Því er ekki að neita að hér er ýmislegt að gerast sem okkur þykir í hæsta máta dularfullt. Við finnum vissulega alltaf sterka strauma frá Snæfellsjökli. En ég þori að fullyrða að þegar jökullinn hefur hreinsað sig undanfarna daga hefur fólk fundið fyrir sterkari straumum frá honum en nokkru sinni fyrr,“ sagði Skúli Alexandersson, fyrr­ verandi alþingismaður, í samtali við DV í gær. Skúli býr á Hellissandi undir jökli. Það er einmitt í kvöld sem fróðir menn segja að geimskip með geimverum innanborðs muni lenda á Snæfellsjökli. Skúli sagði að fólk á Snæfellsnesi tæki þetta með lendingu geimskipa á jökli­ num í kvöld alvarlega. Það væri búið að skipa móttökunefnd sem myndi bíða við jökulröndina í kvöld. Þar er um að ræða sveitarstjórn Eyrarhrepps utan Ennis , björgunarsveitir og lögreglu. „Við tökum þetta alvarlega og ég þori að fullyrða að það muni hundruð manna mæta við jökulröndina ,“ sagði Skúli. Hann sagði líka frá dularfullum atburði sem átti sér stað vestra á dögunum. Mjólkurbílstjóri var að skila af sér mjólk í verslun á Hellissandi. Hann var að gera grín að komu geimskipa og hæddist mjög að þessu öllu saman. Afgreiðslustúlkurnar sögðu honum að tala ekki svona gáleysislega. Þegar bílstjórinn var búinn að afgreiða mjólkina ætlaði hann að gangsetja bílinn og halda áfram. Þá var eins og við manninn mælt, bíllinn fékkst ekki í gang. Þarna mátti hann síðan dúsa í 4 klukkustundir og verslunareigendur í öðrum þorpum urðu að koma til Hellissands til að sækja mjólkina. Þegar það var búið og að liðnum 4 klukkustundum fór bíllinn í gang eins og ekkert væri en engin bilun hafði fundist við ítarlega leit. „Nei, menn skulu umgangast þetta allt með gát ,“ sagði Skúli Alexandersson. — S.dór Að hreinsa sig: (hér) Þegar skýjahulan hverfur af jöklinum Enni: hátt og bratt fjall vestan við Ólafsvík á Snæfellsnesi sem einnig er kallað Ólafsvíkurenni Jökulrönd: þar sem jökullinn endar og landið tekur við Gát: (hér) varkárni, gætni