Smásagnarsmáræði

120 - Smásagnasmáræði þegar pabbi var nýorðinn edrú, og ég var í heimsókn hjá honum hellti ég málningarþynni yfir öll fötin hans. Ég er með ör eftir öllum upphandleggnum af því að ég skar mig með rakvélarblaði í einangrun á Stuðlum. Ég er með gat í tungunni sem ég gerði sjálf. Ég mæli ekki með því. Clark Kent segir mér líka að þetta sé allt út af því að ég var misnotuð af vini stjúppabba míns (ekki bókmenntabjánans heldur þessum sem lamdi mömmu). Ég las í Fréttablaðinu um daginn viðtal við einhverja femínistakonu sem sagði að maður jafnaði sig aldrei eftir slíkt. Ég man alveg eftir þessu öllu. Ég man alveg hvað ég var að gera á fimmtudaginn. Ég man hvað allir hafa gert mér og stundum tekur litla brjálaða ég alveg yfir og ég hata alla. Af því að ég man allt. Ég man eftir krökkunum í Ólafsvík, ég man eftir kennaranum sem hló af því að ég var ekki í sokkum og ekki með nesti af því að mamma svaf brennivínsdauða, ég man eftir góða og sæta vini mínum sem elskaði Bubba Mort- hens og sagðist elska mig. Ég man eftir þessu öllu. Fimmtudeginum eyddum við Begga og Doddi í Kringlunni. Við stálum Coca-Cola ísbirninum sem situr öll jólin og þyk- ist drekka kók í Kringlunni. Þetta er gert svo átfíklar geti líka átt sín jól. Baðað sig í Coca-Cola og rjómasósum og reyktu svínakjöti. Mamma og pabbi kyssast og drekka rauðvín og bjór og kenna börnunum sínum að éta yfir sig. Gefa þeim gjafir á Vísarað og segjast elska hvort annað.