29 Endurgjöf Eitt af höfuðeinkennum leiðsagnarnáms er mikil og góð endurgjöf á meðan nemendur vinna verkefni út frá vel skilgreindum markmiðum og matsviðmiðum. Endurgjöfin má ekki vera á almennum nótum þar sem nemanda er hrósað fyrir afstöðu eða hegðun (t.d. „Mikið einbeitir þú þér vel.“) heldur verður hún að taka mið af þeirri færni sem nemandinn þarf að ná tökum á svo hann komist nær námsmarkmiði sínu (s.s. „Hvaða stafur situr á línunni? Getur þú reynt að hafa hina eins?“) Endurgjöfin þarf jafnframt að fela í sér upplýsingar um hvað eigi að gera næst og hvernig (Wiliam, 2020). Því styttri tími sem líður á milli vinnu nemenda og endurgjafar þeim mun áhrifameiri verður hún (t.d. þegar munnleg endurgjöf á í hlut) en sé endurgjöf skrifleg og umfangs- meiri þurfa nemendur tíma og svigrúm til að vinna úr henni. Gagnlegasta endurgjöfin er sú sem tryggir nemandanum nægilegan skilning á eðli hæfninnar þannig að hann geti yfirfært hana á önnur verkefni. Notkun fyrirmynda Sagt er að mynd sé á við þúsund orð og hið sama má segja um fyrirmyndir. Í leiðsagnar- námi eru fyrirmyndir dæmi um vel unnin verkefni sem uppfylla tilteknar kröfur og er þeim ætlað að samræma skilning nemenda og kennara á því hvernig verkefni eða lokaafurð á að líta út. Við val á fyrirmyndum þarf að hafa nokkur hagnýt atriði í huga. Talið er að það geri lítið gagn að sýna nemendum dæmi um illa unnin verkefni vegna þess að þau hafa ekkert leiðsagnargildi, segja ekkert til um æskileg næstu skref. Forðast skal að nota fyrirmyndir frá nemendum úr bekknum þar sem athyglin getur beinst meira að höfundunum en verkefninu og gott er að sýna fleiri en eina fyrirmynd þar sem alltaf er um fleiri en einn möguleika að ræða við gerð fyrirmyndarverkefnis. Loks getur notkun fyrirmynda verið góð leið til að forðast huglægt mat og rýni í þær getur verið umræðuvettvangur fyrir það sem er gott eða til fyrirmyndar og það sem má betur fara. Notkun fyrirmynda getur gagnast nemendum á öllum aldri en það getur tekið kennara dálítinn tíma að koma sér upp banka af góðum fyrirmyndum. Sjálfsmat – jafningjamat Tilgangur sjálfsmats er sá að nemendur læri að meta eigin styrkleika, þeir geri sér grein fyrir því hvað þeir þurfi að læra betur og þjálfist að setja sér markmið í námi sínu. Til að nemendur geti framkvæmt sjálfsmat þurfa þeir að fá góðar upplýsingar um þau námsmarkmið og matsviðmið sem vinna á eftir. Frá upphafi skriftarnáms fá nemendur tækifæri til að leggja mat á eigin vinnu. Í námsefni 1. og 2. þreps meta nemendur sjálfir eigin stafdrátt á hverri opnu þar sem þeir fá tækifæri til að sýna hvað þeir kunna. Þetta einfalda mat má nota til endurgjafar bæði í spjalli milli kennara og nemanda eða við jafningja. Fyrirkomulagið hentar vel meðan nemendur eru að ná tökum á lestri þar sem ólíklegt er að þeir geti nýtt sér matsramma með flóknu orðalagi. Því fylgja efninu sjálfsmatsrammar fyrir 2.-4. þrep en það er val og mat kennara hvenær hann kýs að nota þá.
RkJQdWJsaXNoZXIy MjIxNzc=