51 50 Humlan Blær minnir nemendur á að halda rétt á blýantinum. Verkefni Nemendur eiga að skrifa orð eftir forskrift. Þraut Krossgáta með tölustöfum. Nemendur skrifa viðeigandi töluorð við tölustafina. Þegar þeir hafa leyst krossgátuna eiga þeir að geta lesið leyniorðið lóðrétt og skrifa það á línuna fyrir neðan. Töluorð sem á að skrifa í krossgátu: fimm, fjórir, sjö, tveir, tíu, átta, þrír og níu. Leyniorð: fjörutíu. Athugið að í prentaðri útgáfu 2026 er villa í krossgátunni en hún er leiðrétt í rafbókarútgáfu. Þar vantar tölustafinn 10 en réttur ritháttur lausnarorðs er fjörutíu (ekki fjörtíu). Bls. 51 Innlögn Kennari rifjar upp með nemendum hvernig við svörum spurningum í málsgreinum í staðinn fyrir að svara með aðeins því sem spurt er um. Kennari gæti rifjað upp fyrri verkefni og skrifað dæmi á töfluna með spurningu og dæmum um annars vegar hvernig spurningu er svarað með einu orði og hins vegar hvernig henni er svarað með málsgrein. Dæmi: Hvað heitir þú? • (nafn kennarans) • Ég heiti (nafn kennarans). Verkefni Nemendur svara spurningum með sínum eigin orðum. Meistaralína Sjá inngangskafla. Bls. 52 Innlögn Kennari rifjar upp með nemendum hvernig á að skrifa tölustafina. Mikilvægt er að minna nemendur á að byrja efst og leggja áherslu á að tölustafir eru lægri en bókstafir, þ.e. upphafspunktur tölustafa er rétt fyrir neðan yfirlínu. Kennari kynnir raðtölur fyrir nemendum. Raðtölur eru tölustafir með punkti fyrir aftan og segja þær til um röðun, til dæmis er 1. (fyrsti) sá sem kemur fyrstur, 2. (annar) er sá sem er númer tvö í röðinni o.s.frv. Gott er að ræða við nemendur um hvenær við notum raðtölur. Dæmi um slíkar aðstæður er þegar við teljum röð jólasveinanna, þegar við segjum í hvaða sæti við vorum í íþróttakeppni og þegar við tölum um dagsetningar eins og afmælisdaga. Hér er um að gera að taka fleiri dæmi og hvetja nemendur til að koma með hugmyndir og sín eigin dæmi. Ef til vill hafa nemendur nú þegar lært raðtölur í stærðfræði og þá er hér um upprifjun að ræða. Mikilvægt er að kenna nemendum að þegar kemur að raðtölum þá gildir ekki reglan um stóran staf á eftir punkti og þarf kennari að kynna nýja reglu til sögunnar: Það er alltaf lágstafur á eftir raðtölu. Best væri að gera þessa reglu með einhverjum hætti sýnilega á vegg og er t.d. tilvalið að láta nemendur búa til veggspjald með reglunni og dæmum sem sýna hana. Humlan Blær minnir nemendur á að byrja efst. Þegar kemur að sjálfsmatinu á næstu síðu er gott að segja nemendum að hafa þessa áminningu í huga við matið. Verkefni Í fyrra verkefninu eiga nemendur að spora ofan í tölustafi. Í seinna verkefninu eiga nemendur að lesa spurningar sem þeir svara með eigin orðum. Bls. 53 Verkefni Nemendur eiga að lesa spurningar og svara þeim. Nemendur fá uppgefin fyrstu tvö orðin í svörunum sem þeir eiga að spora ofan í. Síðan klára þeir að svara spurningunum með því að skrifa dagsetningar fyrir aftan „Í dag ...“, „Í gær ...“ og „Í fyrradag …“ Bls. 54 Innlögn Kennari rifjar upp reglu um hástaf á eftir punkti og segir nemendum að sú regla eigi líka við þegar spurningarmerki og upphrópunarmerki eru notuð. Það er alltaf hástafur á eftir slíkum greinarmerkjum. Kennari sýnir nemendum á töflu hvernig við byggjum upp tækifæriskort eins og afmæliskort. Gott er að sýna nemendum hvernig dagsetning og ártal er gjarnan skrifað efst við hægri spássíu og einnig er gott að útskýra hvernig við getum skrifað mánuðinn ýmist með tölustöfum eða bókstöfum. Neðan við dagsetningu og við vinstri spássíu á að skrifa nafn þess sem á að fá kortið og upplagt að sýna nemendum mismunandi útfærslur á því á töflunni. Sem dæmi er hægt að skrifa elsku, kæra, kæri eða halló fyrir framan nafn viðtakanda. Fyrir aftan nafnið má skrifa upphrópunarmerki. Fyrir neðan þetta er afmæliskveðjan skrifuð og neðst á kortið á að skrifa nafn þess sem gefur kortið eða sendir það. Hægt er að gefa nemendum nokkur dæmi um kveðjur með nafni sendanda, til dæmis: Bestu kveðjur, Kær kveðja, Kveðja, Þinn vinur/vinkona o.s.frv. Humlan Blær minnir nemendur á stóran staf og punkt. Þegar kemur að sjálfsmatinu á næstu síðu er gott að segja nemendum að hafa þessa áminningu í huga við matið. Verkefni Nemendur eiga að skrifa afmæliskort til einhvers sem þá langar til að senda kort. Viðtakandi gæti verið foreldri, afi, amma, systkini, einhver frægur, vinur, ofurhetja, gæludýr eða hver sem nemendum dettur í hug. Bls. 55 Innlögn Kennari sýnir nemendum á töflu hvernig á að merkja umslög. Á umslögum sem við sendum í pósti þarf að koma fram nafn viðtakanda, heimilisfang, póstnúmer og staður. Ef við ætlum að senda kortið til útlanda þarf líka að skrifa heiti landsins þar sem viðtakandinn býr. Kennari getur sýnt nemendum dæmi um frímerki og stimpla sem oftast eru sett efst hægra megin á umslag. Þá er gott að útskýra fyrir nemendum að frímerki og stimpill er staðfesting á að það sé búið að borga póstburðargjaldið og að stimpillinn innihaldi dagsetningu og staðinn þar sem umslagið var póstlagt. Verkefni Nemendur eiga að merkja umslag sem er ætlað undir afmæliskortið sem þeir skrifuðu á síðunni á undan. Hér gefst nemendum tækifæri til að teikna frímerki og/eða stimpil efst til hægri á umslaginu.
RkJQdWJsaXNoZXIy MjIxNzc=