Skapandi dans - Handbók fyrir kennara

58 Jafnvægi Við höldum jafnvægi þegar við stöndum í báða fætur en líka þegar við stöndum á öðrum fæti. Það þarf að passa að spenna vöðvana því annars er hætta á því að verða óstöðugur og hægt að missa jafnvægið (ójafnvægi). Jafnvægiskerfið í innra eyranu gerir okkur kleift að standa, hlaupa, ganga og hreyfa okkur án þess að detta. Nemendur geta ímyndað sér að þeir séu tré með rætur (fætur) sem stingast langt ofan í jörðina (gólfið) og laufblöðin og greinarnar (efri líkaminn) rísa hátt upp í himin til þess að ná betra jafnvægi. Einnig er gagnlegt fyrir kennarann að sýna nemendum jógastellingar (t.d. tréð) sem krefjast jafnvægis til þess að fá nemendur til að prófa og átta sig á hvað jafnvægi merkir. Jafnframt er sniðugt fyrir kennarann að hafa meðferðis grjónapoka til þess að æfa jafnvægi. Hann getur látið nemendur fara ólíkar leiðir um rýmið með grjónapoka á höfðinu. Ójafnvægi (e: off-balance ) er þegar við náum ekki að halda jafnvægi og erum óstöðug. Það endar oftast með falli. Þá er mikilvægt að grípa fallið með mjúkum líkamshlutum eins og rass og læri. Einnig að leyfa höndunum að taka við fallinu til þess að mýkja það.