113 Endurvinnum Endurvinnsla er vissulega mikilvæg en við ættum bara að endurvinna það sem við getum ekki afþakkað, sleppt því að kaupa eða endurnýtt. Þegar við þurfum að kaupa eitthvað í umbúðum sem þarf að endurvinna, getum við í það minnsta valið að kaupa það sem raunverulega er hægt að endurvinna. Skoðið umhverfismerkin á vef umhverfisstofnunar til að vita meira. Áhrif okkar á stjórnvöld og fyrirtæki „Þú ert aldrei of smár til að geta haft áhrif“ – eru mikilvæg orð hennar Gretu Thunberg. Hún hefur svo sannarlega sýnt það í verki með því að eiga stóran þátt í þeirri miklu alþjóðlegu hreyfingu ungs fólks í baráttu fyrir alvöru loftslagsaðgerðum. Hún er gott dæmi um að venjulegt fólk getur haft mikil áhrif á breytingar í samfélaginu. Við getum öll haft áhrif. Breyting á eigin gildum og neyslu er mikilvægur upphafspunktur nauðsynlegra kerfisbreytinga. En áhrif okkar geta náð enn lengra. Einstaklingar geta skapað mikinn þrýsting á fyrirtæki, stjórnmálafólk og aðra einstaklinga. Áhrif okkar margfaldast þegar okkur tekst að hafa áhrif á aðra. Við getum kosið að hafa áhrif á aðra sem einstaklingar eða hluti af heild, eins og í grasrótarhreyfingu. Við getum einnig tekið þátt í eða hrundið af stað átaksverkefnum. Grasrótarhreyfing er samtök fólks sem berst fyrir ákveðnum málstað utan hefð- bundinna stjórnmálaflokka. Máttur gras- rótar getur verið mikill ef fólk innan hennar vinnur saman að settu markmiði. Dæmi um slík samtök á Íslandi eru Ungir umhverfissinnar og Landvernd. Dæmi um átaksverkefni eru Plastlaus september og Vakandi.
RkJQdWJsaXNoZXIy MjIxNzc=