Ritrún 3

3 Það er leikur að læra Lestu vísuna. Það er leikur að læra, leikur sá er mér kær, að vita meira og meira, meira í dag en í gær. Guðjón Guðjónsson Hefur þú hugleitt hvað þú öðlast mikla þekkingu við það að læra að lesa? Þú lærir bókstafina. Þeir eru tákn eða merki fyrir hljóðin í málinu okkar. Bókstafirnir eru 36 og kallast einu nafni stafróf. Með bókstöfunum í stafrófinu getur þú búið til og skrifað orð sem þú vilt að aðrir lesi. Þú getur einnig lesið um það sem gerðist fyrir þúsundum ára, í gær og verður á morgun. Úr stafrófinu má búa til orð um allt mögulegt.