| 40345 | MIÐSTÖÐ MENNTUNAR OG SKÓLAÞJÓNUSTU 2024 | 30 | Aldurssvarandi leiktæki ætluð börnum Samkvæmt gildandi staðli yfir leikvallatæki EN 1176 eiga öll leiktæki að vera með aldursmerkingu. Starfsmenn þurfa að vita hvaða tæki á leiksvæðinu hæfa hverjum aldri fyrir sig og gæta þess að börn reyni ekki að fara upp í leiktæki sem ekki hæfa aldri þeirra. Þó að leiktækið standist strangar kröfur um öryggi byggir áhættumat á getu þeirra barna sem eiga að nota tækið. Því er það beinlínis hættulegt að börn undir aldurstakmarki tækisins noti það. Ekki er æskilegt að lyfta barni upp í tæki sem það getur ekki komist upp í sjálft. Notkun reiðhjólahjálma Börn yngri en 16 ára skulu nota reiðhjólahjálm við hjólreiðar. Börn eiga þó einungis að nota hjálm á hjóli, ekki þegar þau eru að leika sér í öðru. Þríhjól eru líka hjól, svo að börn ættu að vera með hjálm á þeim, en mikilvægt er að þau taki hann af sér þegar þau fara að leika í öðru. Margir foreldrar hafa af þessu áhyggjur því þeir vilja verja höfuð barna sinna og venja þau á það strax að nota alltaf hjálm þegar farið er á hjól sama hvaða tegund hjóla er um að ræða. Hjólaferðir leikskóla Ekki ætti að fara í hjólaferðir með leikskólabörn nema að vel ígrunduðu máli. Á þessum aldri er mikill munur á getu barna þegar kemur að því að hjóla. Það er mikilvægt að öll börn séu á hjóli sem þau ráða vel við. Slíka ferð ætti að fara sem lengst frá akandi umferð og reyna að velja leið með sem mestu flatlendi. Brekkur, bæði upp og niður, geta verið erfiðar og hættulegar hjólandi börnum sem eru að læra á umhverfi sitt og læra að meta hættuna sjálf. Í svona ferðum er mikilvægt að gæta að því að nóg af starfsfólki sé með í för til að gæta fyllsta öryggis. Einnig væri sniðugt að starfsmaður tæki leiðina út stuttu áður til að skoða aðstæður og meta hvort leiðin sé örugg, þá með tilliti til ástands hjólastígsins, hvort það eru holur í veginum eða steinar eða annað sem gæti þvælst fyrir börnunum, þar sem þau ráða illa við það óvænta sem kemur upp. Mikilvægt er að börnin séu öll með hjálma sem passa og eru rétt festir á höfuð þeirra. Í svona ferðum er starfsfólk mikilvægar fyrirmyndir og því er mikilvægt að starfsfólkið sé einnig með hjálm. Eftirlit starfsfólks með börnum á lóðum Gæsla leikskólabarna á leikskólalóðum er afar mikilvæg. Börn eru orðin 12 ára gömul þegar þau hafa öðlast þroska og getu til að verja sig gegn slysum og lesa rétt í uppákomur og áskoranir sem þau verða fyrir. Leikskólinn er menntastofnun og því er mikilvægt að nýta aðstæður í leik og starfi með börnum og kenna þeim á hætturnar. Samskipti barna geta farið úr böndum og börnin eru það ung að ekki er um ásetning að ræða ef barn meiðir annað barn. Mikilvægt er að nýta aðstæður sem skapast á lóðinni til að kenna þeim lífsleikni. Ef barn er að hrinda eða slá annað eða troða sér fyrst í leiktækið er mikilvægt að stoppa barnið og ræða við það. Slysavarnir snúast ekki um að banna barninu að klifa í trénu heldur að kenna því að klifra á öruggan hátt. Margir eru hræddir við klifur barna í trjám og banna þeim það. Börn eru komin með samhæfingu handa og fóta um 4 til 5 ára og geta því klifrað hátt upp. Það er því mikilvægt að leyfa þeim það en ekki að fara mjög hátt heldur að kenna þeim hvenær þau eiga ekki að fara hærra. Góð regla er að kenna þeim að fara aldrei út á grein sem er mjórri en handleggur þeirra, því slík grein heldur ekki þyngd þeirra. Eins getur verið hættulegt ef þau eru í hálum skóm eða stígvélum að klifra í trjám í bleytu. Þetta er gott dæmi um hvernig má koma í veg fyrir slys og tryggja öryggi barnanna betur.
RkJQdWJsaXNoZXIy MjIxNzc=