| 40345 | MIÐSTÖÐ MENNTUNAR OG SKÓLAÞJÓNUSTU 2024 | 27 | Kokhólkur Hafa skal í huga að ung börn stinga hlutum upp í sig. Nota skal kokhólk til að mæla smáhluti sem geta valdið köfnun hjá börnum. Kokhólkur ætti að vera til í öllum leikskólum. Kokhólkur er mælitæki sem notað er til að mæla stærð smáhluta sem geta valdið köfnun hjá yngri börnum. Sjá nánar á vef Neytendastofu. Nokkur atriði til athugunar við innkaup á leikföngum Fyrir börn á leikskólaaldri þarf að velja leikföng sem þau ráða við, sérstaklega hvað varðar stærð, hraða og jafnvægi. Forðast ætti leikföng og leiktæki sem ná miklum hraða. • Gæta þarf sérstaklega að því að leikföng hafi ekki hvassar brúnir eða hvöss horn. • Varast ætti leikföng eða aðrar vörur sem líkjast matvælum. • Á brúðum og tuskudýrum eiga augu, nef, hár, hnappar og aðrir smáhlutir að vera vel festir. Þessir hlutir þurfa einnig að þola þvott. • Snúrur og bönd í leikföngum mega ekki vera lengri en 22 cm. • Teygjubönd föst við leikföng, t.d. bolta, mega ekki vera lengri en 3 cm. • Ef límmiði er festur á leikfang er mikilvægt að ganga úr skugga um að börn geti ekki náð honum af og stungið upp í sig. • Ef leikfang inniheldur smárafhlöðu þarf lokið yfir rafhlöðuna að vera tryggilega fest, þar sem rafhlaða sem losnar getur valdið köfnunarhættu. Slíkar rafhlöður innihalda einnig eiturefni sem geta verið ætandi. • Blöðrur eru ekki æskilegar fyrir börn yngri en átta ára. Ef blaðra springur þarf að gæta að því að henda öllum hlutum hennar. Álblöðrur eru hættuminni en latexblöðrur. • Leikföng sem gefa frá sér há og hvell hljóð eiga að vera með viðvörunarmerkingu þess efnis að leikfangið eigi ekki að bera upp að eyra, þar sem það geti skaðað heyrn. • Mikilvægt er að leikföng séu sterkleg. Börn yngri en þriggja ára þurfa leikföng sem þola mikið hnjask. Leikföng úr harðplasti skal velja vel, en sum þeirra geta brotnað auðveldlega. • Búningar og leikföng ættu ekki að vera úr eldfimu efni. Til að tryggja öryggi barna skal fylgjast vel með því að leikföng sem eru brotin eða skemmd séu tekin strax úr umferð. Mikið er um slys vegna þess að leikföng eru brotin eða ónýt. Forðast skal leikföng sem innihalda hnapparafhlöður eða segla, þar sem hætta getur myndast á því að börn komist í rafhlöðurnar eða seglana. Mest er hættan fyrir börn yngri en fjögurra ára, því þau eru á svokölluðu munnstigi og setja allt í munninn. Ef þau gleypa hnapparafhlöðu eða segla geta þau orðið fyrir lífshættulegum áverkum. Best er að hafa þessi leikföng ekki í leikskólum þar sem mikill erill er og oft erfitt að fylgjast með stórum hópi barna.
RkJQdWJsaXNoZXIy MjIxNzc=