| Orð eru ævintýri | Hugmyndabanki fyrir leikskóla | 2922 | MMS 2024 | 89 Tónlist Kúra finnst dásamlegt að hlusta á tónlist. Best finnst honum að liggja á bakinu í sófanum heima hjá sér og hlusta á fallegt lag. Hann hefur tekið eftir því að mannfólki finnst það líka. Margir virðast einnig hafa gaman af að spila á hljóðfæri eða syngja. Til eru margar tegundir af tónlist og mismunandi hljóðfæri gefa frá sér ólík hljóð. Í tónlistarskólanum í hverfinu er hægt að læra á alls konar hljóðfæri og prófa að spila með öðrum í hljómsveit. Þar er líka hægt að æfa söng. Kúri læðist inn í tónleikasalinn þegar verið er að stilla upp fyrir æfingu. Sum hljóðfæri eru blásturshljóðfæri, önnur ásláttarhljóðfæri og enn önnur eru strengjahljóðfæri. Á viss hljóðfæri er hægt að nota boga eða kjuða og hljómsveitarstjórinn sveiflar sprota þegar hann stjórnar tónlistarmönnunum. Kúri kemur sér fyrir á meðal áhorfendanna. Hann bíður spenntur eftir að leikið verði á trommurnar því þá titrar gólfið. • Hvaða hljóðfæri eru blásturshljóðfæri? En strengjahljóðfæri? En ásláttarhljóðfæri? • Á hvernig hljóðfæri langar ykkur að spila? Hugmyndir að umræðuefni • Umræður um hljóðfæri og tónleika. • Spyrjið börnin hvaða hljóðfæri þau þekkja? Hvað heita hljóðfærin? Hvetjið börnin til að hafa eftir ykkur heiti hljóðfæranna. Hvernig heyrist í þeim? • Eru börnin að læra á hljóðfæri? Er einhver sem þau þekkja að æfa sig að spila á hljóðfæri? • Tala um að orðið „hljóðfæri“ sé eitt orð yfir öll hljóðfærin á smámyndunum. • Spyrjið börnin hvort þau eigi uppáhaldslag eða hvort þau þekki einhver lög? • Spyrjið börnin hvort þau hafi farið á tónleika? Hvað var gert á þeim tónleikum? • Merking orða; t.d. „Jón spilaði á munnhörpu, er hann þá tónlistarmaður eða smiður?“
RkJQdWJsaXNoZXIy MjIxNzc=