| Orð eru ævintýri | Hugmyndabanki fyrir leikskóla | 2922 | MMS 2024 | 70 Úti í móa Kötturinn Kúri veit fátt yndislegra en að rölta út í móa, finna ilminn af gróðrinum og hlusta á lóuna, spóann eða aðra fugla syngja. Á haustin fer fólk gjarnan út í móa til að tína margs konar ber. Kúri er búinn að átta sig á því að berjalyng vex vel í brekkum sem snúa á móti sól. Þangað leita fuglarnir enda eru þeir sólgnir í ber og kóngulær eru líka sagðar vísa mönnum á berjamó. En Kúri hefur meiri áhuga á flugum, fiðrildum og alls kyns skordýrum. Honum finnst gaman að fylgjast með geitungum úr fjarlægð en ef þeir koma of nálægt, baðar hann út öllum öngum! • Hvað finnst ykkur gaman að gera úti í náttúrunni? • Hvaða fugla þekkið þið? Hugmyndir að umræðuefni • Spyrjið börnin hvort þau hafi farið út í mó eða í berjamó? Hvað sjá þau á myndinni? Hvað er á litlum myndunum í kring? Spyrjið þau hvaða ber þau þekki? Má borða öll ber? Hvernig bragðast ber? • Hafa börnin farið í berjamó? Byggið upp umræður um hvenær er best að fara í berjamó og af hverju. • Talið um berjalyngið og um mosann. Af hverju þarf að vernda hvort tveggja? Skapið umræður um hvað felist í virðingu fyrir náttúrunni. Talið um hvað náttúruvernd felur í sér. • Á myndinni eru nokkrir fuglar. Notið tækifærið og talið um heiti fuglanna, hljóðin sem þeir gefa frá sér. Spyrjið börnin um hvaða fugla þau þekki? Á heimasíðu MMS er vefur sem kallast Fuglavefurinn. Þar má fræðast nánar um fuglana á Íslandi, t.d. um landfugla, spörfugla og vaðfugla. Á síðunni eru allskonar fróðleikur um fugla og leikir. • Talið um heiti blóma, jurta og trjáa sem sjást á myndinni og hvetjið börnin til að ræða hvort þau hafi séð blóm eins og koma fyrir á opnunni.
RkJQdWJsaXNoZXIy MjIxNzc=