| Orð eru ævintýri | Hugmyndabanki fyrir leikskóla | 2922 | MMS 2024 | 44 Í búðinni Kúri er fastagestur í hverfisbúðinni því honum finnst ilmurinn af nýbökuðu brauði og kökum vera ómótstæðilegur. Afgreiðslufólkið þekkir hann vel en vill ekki hafa dýr innan um allar matvörurnar í versluninni. Þegar afgreiðslumaðurinn ætlar að reka köttinn út hleypur Kúri af stað. Hann veit fátt skemmtilegra en góðan eltingaleik og þeytist inn í kælinn þar sem mjólkurvörurnar eru geymdar. Afgreiðslumaðurinn eltir hann inn í kuldann en Kúri rýkur þá fram og hleypur hringinn í kringum frystiborð með fisk- og kjötvörum. Því næst snarast hann aftur fyrir ávaxtarekkann. Þar bíður hann spenntur eftir að afgreiðslumaðurinn nálgist og stekkur svo aftur af stað og felur sig innan um grænkeramatinn. Að lokum gefst afgreiðslumaðurinn upp og snýr aftur að afgreiðsluborðinu með færibandinu. Þá röltir Kúri út um dyrnar eins og hver annar viðskiptavinur. Kúri hafði vit á því að drífa sig út úr búðinni áður en nokkur tók eftir honum – það heyrðist nefnilega brothljóð þegar hann stökk upp á sjálfsafgreiðsluborðið. • Hvað brotnaði? • Hvað er hverfisbúð? Hugmyndir að umræðum • Skoðið opnuna með börnunum og ræðið þeirra reynslu af því að fara í búðina. Hvað er skemmtilegt, leiðinlegt? • Skoðið smámyndirnar í kring, finnið sömu hluti á stóru myndinni. Nefnið heiti hlutanna og talið um hvað maður gerir við þá. Talið líka um stærð, liti og bragð þar sem það á við. • Hvað gerir maður í búðinni? Hvað er fólkið á myndinni að kaupa? Hvað kaupa hinir fullorðnu sem börnin fara með í búðina? Kaupa þau mikið, lítið? Sitja börnin í innkaupakerrunni? Hvað gera þau þar?
RkJQdWJsaXNoZXIy MjIxNzc=