| Orð eru ævintýri | Hugmyndabanki fyrir grunnskóla | 2893 | MMS 2024 | 89 Sápukúlur svífa um og Kúri er alsæll því hann fær að vera með í fjörinu. Hann vill ekki vera út undan – frekar en nokkur annar. Skemmtilegast finnst honum þegar sápukúlurnar springa. Hvaða útileikir finnst ykkur skemmtilegir? Í búðinni Kúri er fastagestur í hverfisbúðinni því honum finnst ilmurinn af nýbökuðu brauði og kökum vera ómótstæðilegur. Afgreiðslufólkið þekkir hann vel en vill ekki hafa dýr innan um allar matvörurnar í versluninni. Þegar afgreiðslumaðurinn ætlar að reka köttinn út hleypur Kúri af stað. Hann veit fátt skemmtilegra en góðan eltingaleik og þeytist inn í kælinn þar sem mjólkurvörurnar eru geymdar. Afgreiðslumaðurinn eltir hann alltaf inn í kuldann en Kúri rýkur þá fram og hleypur hringinn í kringum frystiborð með fisk- og kjötvörum. Því næst snarast hann aftur fyrir ávaxtarekkann. Þar bíður hann spenntur eftir að afgreiðslumaðurinn nálgist og stekkur svo aftur af stað og felur sig innan um grænkeramatinn. Að lokum gefst afgreiðslumaðurinn upp og snýr aftur að afgreiðsluborðinu með færibandinu. Þá röltir Kúri út um dyrnar eins og hver annar viðskiptavinur. Kúri hefur vit á því að drífa sig út úr búðinni áður en nokkur tók eftir honum – það heyrðist nefnilega brothljóð þegar hann stökk upp á sjálfsafgreiðsluborðið. Vitið þið hvað brotnaði? Afmæli Nágranni Kúra, á afmæli og gleðiglaumur berst út um opinn gluggann heima hjá honum. Kötturinn læðist inn því hann veit fátt skemmtilegra en fjölmenn afmælisboð. Það er enn verið að skreyta og Kúri veltir fyrir sér hvort hann eigi kannski að hjálpa til. Haldið þið að það sé góð hugmynd? Öll fjölskylda afmælisbarnsins er mætt í veisluna; foreldrar, systkini, afar, ömmur, frænkur og frændur. Afmælisbarnið blæs á kertin á kökunni, gestirnir klappa og allir fá risastóra sneið af afmæliskökunni. Einn gestanna getur ekki stillt sig um að opna litskrúðugan pakka en afmælisbarninu er örugglega alveg sama því gjafirnar eru svo margar. Kúri getur hins vegar ekki beðið eftir því að fá að leika sér með veifurnar sem hanga í glugganum. Form, litir, tölur Kúri hefur gaman af þrautum. Hér er þrautin sú að finna formin, litina og mynstrin sem eru vinstra megin á opnunni – á felumyndinni sem er hægra megin á opnunni. Skoðið myndina gaumgæfilega. Þar má líka telja viss atriði frá einum upp í tuttugu. Stjörnurnar á boltanum eru til dæmis sex talsins. Góða skemmtun! Hátíðir Kúri heldur meira upp á suma daga en aðra. Hann vill frekar vera saddur en svangur og veit fátt betra en að borða. Kötturinn hefur því mikið dálæti á dögum þegar sérstakur matur er á boðstólunum eða nammi. Bolludagur, sprengidagur og öskudagur eru einmitt þannig dagar og páskarnir líka. Um páskana þvælist Kúri á milli húsa til að smakka á góðgætinu. Á meðan vinur hans les málsháttinn læðist Kúri að páskaunganum. Hvað ætlar hann að gera?
RkJQdWJsaXNoZXIy MjIxNzc=