85 Náttúrulega 3 │ 3. kafli Ef ljósapera er tengd rétt við rafhlöðu með tveimur vírum kviknar ljós. Ef annar vírinn væri losaður myndi slokkna á perunni. Þegar rafrásir eru tengdar saman skiptir máli hvernig það er gert og fer það eftir markmiðinu með tengingunni. Jólasería er þannig byggð að margar ljósaperur eru tengdar saman svo þær geti tengst við eina innstungu. Þá er hægt að kveikja og slökkva á öllum ljósunum á sama tíma. Þegar ljósaperurnar eru tengdar saman, ein við aðra, í beinni röð kallast það að raðtengja. Ókostur við þetta er að ef ein pera skemmist getur serían hætt að lýsa þar sem straumurinn kemst ekki í gegnum peruna og áfram til þeirrar næstu. Raðtengdar jólaseríur geta hins vegar verið ódýrar í framleiðslu. Þegar ljósaperur eru raðtengdar lýsa þær ekki mjög skært þar sem þær deila raforkunni í rafhlöðunni. Hægt er að tengja fleiri rafhlöður inn í rafstraumrásina til að fá sterkara ljós. Tryggja þarf að rafhlöðurnar snúi eins. Einnig er hægt að tengja ljósaperur þannig að virkni einnar hafi ekki áhrif á hina. Það kallast hliðtengt. Þá lýsa perurnar skært en rafhlaðan tæmist mun hraðar þar sem einungis ein rafhlaða útvegar raforku til margra ljósapera. Raðtengdar perur. Hliðtengdar perur.
RkJQdWJsaXNoZXIy MjIxNzc=