104 Náttúrulega 3 │ 4. kafli Manneskjur leggja undir sig landsvæði og breyta því til að geta framleitt meiri mat og varning sem oftar en ekki er hent. Við þetta eyðileggjast búsvæði ýmissa lífvera með þeim afleiðingum að mikilvægar lífverur í vistkerfum þurrkast út. Þrátt fyrir að auðlindir séu takmarkaðar notar fólk gas, olíu, málma og fleira eins og um sé að ræða ótæmandi auðlindir. Verði ekki breyting á verður ekkert eftir af þessum gæðum fyrir komandi kynslóðir. Neyslan er gjarnan drifin áfram með það að markmiði að auka hagvöxt sem er aukning á þjóðarframleiðslu. Fólk upplifir áreiti í formi auglýsinga úr öllum áttum þar sem það er hvatt til að kaupa alls kyns vörur til að auka hamingju. Allir tapa þó á svona gríðarlegri neyslu og fjárhagslegur hagnaður dreifist á hendur fárra. Mikilvægt er að minnka neyslu og endurnota eða endurnýta það sem þegar hefur verið framleitt í stað þess að framleiða sífellt nýjar vörur. Oft kaupum við svo miklu meira af vörum en við getum notað sem leiðir til þess að geymslur og nytjagámar á endurvinnslustöðum fyllast af dóti.
RkJQdWJsaXNoZXIy MjIxNzc=