Náttúrulega 1

3 Náttúrulega 1 │ 1. kafli Kæru nemendur Í náminu og lífinu almennt munuð þið rekast á ýmislegt sem þið skiljið ekki. Þegar það gerist hafið þið val. Þið getið gefist upp og ekki lært neitt eða leitað að upplýsingum sem ykkur vantar til að leiða ykkur að rétta svarinu. Stundum þarf að hafa talsvert fyrir leitinni en þá er lykilatriði að gefast ekki upp. Prófið ykkur áfram en ef hindranir verða á vegi ykkar er gott að fá hugmyndir að lausn frá öðrum. Í hvert skipti sem þið tileinkið ykkur nýja þekkingu stækkar þekkingabankinn. Þá verður auðveldara að tileinka sér enn frekari þekkingu með því að byggja á því sem þið vitið nú þegar. Náttúrufræðin útskýrir fyrir okkur sannleikann um náttúruna. En hvernig vitum við hvernig heimurinn í kringum okkur virkar? Í gegnum tíðina hafa vísindamenn safnað saman upplýsingum og komið með tilgátur um það hvernig heimurinn virkar. Stundum eru tilgáturnar réttar og stundum rangar. Það er hluti af ferli vísinda. Áður fyrr töldu flestir að sólin snerist í kringum jörðina. En sönnunargögn sýndu síðar að það er jörðin sem snerist í kringum sólina. Þetta var síðan staðfest með fleiri athugunum og mælingum. Það er mikilvægt að læra hvernig heimurinn virkar og að rannsaka hugmyndir okkar og ræða þær við aðra. Þegar allt kemur til alls eru það sönnunargögnin sem skipta máli og segja okkur hvað er satt og rétt. Við komumst ekki alltaf að endan- legri niðurstöðu. Stundum finnum við ekki svarið sem við leitum að en okkar hugmyndir og vinna getur hjálpað öðrum að finna svarið. Síðan getur verið að það séu til mörg rétt svör.