| 40318 | © Landvernd og Menntamálastofnun 2022 | NÁTTÚRA TIL FRAMTÍÐAR 80 Undirbúningur Í þessu verkefni verða gerðar tilraunir með hvaða aðferðir henta best til vistheimtar á ógrónum vegkanti. Ef allir vegkantar í nágrenni skólans eru með fallegum staðargróðri eða henta hreinlega ekki í svona tilraun mætti nota annarskonar svæði sem eru illa gróin. Þar má nefna gróðursnautt land sem þarf að græða upp, gamlar námur, vinnusvæði sem ekki hefur verið gengið frá eða önnur ógróin svæði. Athugið að fá alltaf leyfi frá skóla, sveitarfélagi og/eða landeiganda áður en farið er í framkvæmdir. Skítatilraunin er einföldun á stóru tilrauninni Vistheimt á gróðursnauðu landi í verkefninu Vistheimt með skólum. Í þessari skítatilraun eru notaðar allar þær húsdýraskítategundir sem skólinn eða þið nemendur geta nálgast. Um ræðir m.a. hæsnaskít, kúaskít, kindaskít, svínaskít og hrossaskít og þetta eru kallaðar mismunandi meðferðir. Ef eitthvað af þessu vantar þá er hægt að nota t.d. moltu eða moð í staðinn. Gott er að byrja á hugmyndafundi, tala um hvaða lífræna efni henta í vistheimt. Dettur ykkur eitthvað meira í hug en það sem hefur verið áður nefnt? Í vistheimt þarf að muna að val á meðferðum getur skipt máli þegar markmiðið er að fá aftur þann gróður sem var á svæðinu áður. Í húsdýraskít geta vissulega verið allskonar fræ sem henta misvel til vistheimtar en húsdýraskítur er mjög næringarefnaríkur og góður lendingarpallur fyrir fræ plantna sem vaxa í nágrenninu. Veljið í sameiningu fimm meðferðir. Meðferðirnar felast allar í að bæta næringu inn í vistkerfið en mismunandi meðferðir nýtast því mishratt og á mismunandi hátt. Næringarefnin í skít, moði og moltu leysast hægt upp og veita fræjum einnig skjól en mismunandi skítur getur haft ólík áhrif. Á næstu árum munuð þið finna út hvaða áhrif meðferðirnar hafa á vegkantinn nálægt skólanum ykkar. Kannski kemur niðurstaðan ykkur á óvart! Hvernig prófið þið og berið saman mismunandi meðferðir? ? Þið setjið upp tilraun til að bera saman mismunandi meðferðir. Þið afmarkið tilraunareiti og í hverjum reit er ein meðferð prófuð. Að auki verður einn reitur að vera tómur, þ.e.a.s. ekkert er sett í hann. Það er gert svo hægt sé að bera hann saman við meðferðarreitina. Þessi reitur er kallaður viðmið. Með því að bera saman viðmið og meðferðir er hægt að mæla hve mikill gróður og hvaða tegundir plantna vaxa í tilraunareitunum ykkar samanborið við viðmiðið. Viðmiðið er eins og tilraunareitirnir voru áður en ráðist var í tilraunirnar og lýsa því ástandinu eins og það hefði verið ef engar tilraunir hefðu farið fram. Með þessu móti fáið þið hugmynd um áhrifin af meðferðunum sem þið beitið. Jafnframt er hægt að fjalla um hvernig meðferðirnar hafa áhrif á hringrásir næringarefna og vatns. Hafið einnig í huga að tíminn getur verið mikilvægur og þó að ein meðferð virðist skila mestum árangri eftir fyrsta sumarið (t.d. mest af grasi) þarf það ekki endilega að þýða að sú meðferð gefi bestan árangur (t.d. mestan gróður og flestar tegundir) eftir nokkur ár. Nú er komið að því að þið mótið sjálf rannsóknaspurningar. Hvað er það sem þið ætlið að rannsaka? Hvaða meðferð haldið þið að virki best/verst til að endurheimta vistkerfið við veginn?
RkJQdWJsaXNoZXIy MjIxNzc=