| 40318 | © Landvernd og Menntamálastofnun 2022 | NÁTTÚRA TIL FRAMTÍÐAR 66 Verkefni 4. Endurheimt votlendis Byrjið þetta verkefni á að horfa á Bríeti, Sævar Helga og Tolla vekja athygli á endurheimt votlendis. Horfið líka á stutt myndband Ellerts Grétarssonar um fjölbreytt og falleg votlendi á Íslandi. Áætlaður tími fyrir verkefni Þetta verkefni er hugsað sem langtímatilraun þar sem gróðurmælingar og vöktun lífríkis er framkvæmt í endurheimtu votlendi a.m.k. einu sinni á ári. Tilgangur Tilgangur þessa verkefnis er að auka landlæsi ykkar, að þið kynnist aðferðum við endurheimt votlendis og fáið tækifæri til fylgjast með árangri þessara aðgerða. Ef þessar vistheimtaraðgerðir heppnast vel þá sjáið þið vatnsstöðuna á svæðinu hækka. Þið sjáið einnig breytingar í samsetningu gróðursins þar sem votlendistegundir fara að bætast við vistkerfið ásamt því að fugla-, dýra- og smádýralíf mun að öllum líkindum aukast og breytast. Þetta er allt liður í því að endurheimta og auka lífbreytileika svæðisins sem var skemmt eða raskað. Fræðsla og undirbúningur Lesið kaflann Lesið í náttúruna Í þessu verkefni þarf að koma á samstarfi við sveitarfélag eða einkaaðila sem er að endurheimta votlendi. Þegar svæði hefur verið valið getið þið byrjað að undirbúa og skipuleggja vettvangsvinnuna. Best væri að gera mælingar á svæðinu áður en mokað er ofan í skurðina svo þið hafið grunngögn í höndunum sem sýni stöðuna fyrir framkvæmdir. Síðan væri gott að mæla a.m.k. einu sinni á ári eftir framkvæmdir. Skoðið kort af svæðinu og skiptið því niður í hólf, hægt er að miða við skurðina og setja upp fasta mælingastaði sem hægt er að merkja nákvæmlega síðar með járnteini. Þið skulið undirbúa ykkur í skólastofu áður en farið er á vettvang svo það verði auðveldara að greina lífverurnar.
RkJQdWJsaXNoZXIy MjIxNzc=