Mannslíkaminn - Litróf náttúrunnar

147 VÍMUEFNI Áfengi berst hratt út í blóðið Þau áhrif sem áfengi hefur á líkamann ráðast af því hversu mikið er drukkið og hvers konar áfengi. Brennt vín er missterkt. Sterkustu, brenndu vínin eru til dæmis næstum því áttfalt sterkari en sterkur bjór. En áhrifin og skaðsemin eru hin sömu án tillits til þess hvort etanólið er í bjór, víni eða sterku áfengi. Áfengið berst úr maga og smáþörmum út í blóðið strax nokkrum mínútum eftir að það er drukkið. Styrkur áfengisins (etanólsins öllu heldur) í blóðinu er mældur í prómillum, en prómill þýðir þúsundasti hluti. Sá sem hefur áfengisstyrk sem nemur einu pró- milli í blóðinu hefur einn millilítra af hreinu etanóli í hverjum lítra blóðs. Fjöldi prómilla í blóðinu og áhrifin af tilteknu magni áfengis eru mismunandi eftir líkamsþyngd , kyni og aldri . Hvernig áhrifin og víman koma fram hjá fólki getur líka ráðist af því sem fólk hefur borðað og hvaða væntingar fólk hefur gert sér áður. Ungt fólk er sérstaklega viðkvæmt fyrir áfengi Áfengi hefur meiri og skaðlegri áhrif á ungt fólk en aðra. Það byggist að hluta á því að frumuskipting er hraðari og meiri í ungum líkama en eldri og áfengið truflar frumuskiptinguna. Þetta kemur sérstaklega vel (eða illa) fram ef fóstur í móður­ kviði kemst í snertingu við áfengi. Ef þunguð kona drekkur áfengi setur hún barn sitt í mikla hættu. Áfengið berst úr blóði móðurinnar og yfir í blóð fóstursins. Áhrif áfengisins á fóstrið koma meðal annars fram í lélegu minni og námsörðugleikum síðar. Sjón barnsins kann að verða skert og auknar líkur eru á vansköpun. Sama áfengismagn getur valdið mismiklum áfengisstyrk í blóðinu. Fjöldi prómilla í blóði ræðst af líkamsþyngd, kyni og aldri. Þetta var rosalega skemmti- legt partí, að minnsta kosti til að byrja með … 0,2‰ 0,46‰ 0,32‰