Maður og náttúra

29 VISTFRÆÐI Gíraffar og sebrahestar geta lifað á sama landsvæði vegna þess að þessi dýr bíta plöntur í mismunandi hæð og eru því ekki í beinni samkeppni um fæðu. Fjölskrúðug vistkerfi hafa marga sessa Vegna þess að lífverur af mismunandi tegundum í vistkerfi hafa að­ lagast og skipa mismunandi sess í vistkerfinu geta þær lifað án þess að samkeppnin verði mikil. Nokkrar tegundir plöntuætna geta til dæmis lifað á sama svæði án mikillar samkeppni ef þær éta ekki sömu tegundir. Gíraffi bítur laufblöð hátt í trjám en antilópur og sebrahestar bíta grös og laufblöð af runnum og lágum trjám. Þessir grasbítar eru því ekki á sama sessi í vistkerfinu og keppa því ekki um sömu fæðu. Ef tvær tegundir eru á sama sessi endar samkeppni milli þeirra yfir­ leitt með því að önnur hefur sigur og bolar hinni burt. Í fjölskrúðugu vistkerfi eru margar tegundir lífvera og það er því margbreytilegt og þar finna margar lífverur sinn sérstaka sess. Frumskógar og blandaðir skógar með lauf- og barrtrjám eru dæmi um fjölbreytileg vistkerfi þar sem fjöldi plantna, dýra og annarra lífvera geta lifað og komist vel af.