Maðurinn hugur og heilsa

18 Innri gerð vöðva Vöðvi er gerður úr fjölda af grönnum þráðum sem geta dregist saman eins og teygja. Vöðvaþræðirnir eru grennri en hár en þeir verða allt að 30 sentimetra langir í stórum vöðvum. Hver þráður er ein gríðarstór fruma. Margir þræðir eða frumur í vöðva tengjast saman í búnt eða knippi, og hver vöðvi er gerður úr mörgum samsíða knippum. fróðleikur Vöðvarnir togast á Þegar þú spennir vöðva dregst hann saman og gildnar. Þegar vöðvinn styttist togar hann í sinarnar sem hann er festur við. Þá hreyfast hlutar líkamans innbyrðis. En vöðvi getur bara togað, ekki ýtt á eftir. Þess vegna vinna flestir vöðvar saman tveir og tveir. Þegar þú kreppir handlegginn um olnboga dregst tvíhöfðinn saman. Hann styttist og gildnar og togar í sinar í framhandleggnum svo að handleggurinn kreppist. Til að rétta úr handleggnum dugir ekki að skipa tvíhöfða að ýta honum til baka, því það getur hann ekki. Þá kemur til kasta annars vöðva, þríhöfða, sem er aftan á upphandleggnum. Þegar hann dregst saman, réttist úr tvíhöfða og þar með úr öllum arminum. Langflestir vöðvar í líkamanum vinna saman í svona tveggja vöðva teymi. Annar togar hluta líkamans í eina átt, hinn togar á móti og dregur líkamspartinn til baka. Þessi vöðvi kallast tvíhöfði. Geturðu fundið hann í upphandleggnum?