20 LÍKAMI MINN TILHEYRIR MÉR – LEIKSKÓLI | MENNTAMÁLASTOFNUN – BARNAHEILL 2023 | 40340 | HVAR OG HVENÆR Á AÐ EIGA SAMTAL? • Finndu stað þar sem þið getið rætt saman án truflana. Samtalið mun sennilega reynast barninu erfitt og truflun frá öðrum getur leitt til þess að barnið loki sig af og geti ekki lokið við frásögnina. Ef samtalið hefst upp úr þurru skaltu reyna að finna stað á svæðinu þar sem þið getið verið ein, til að vernda barnið. Þú getur til dæmis beðið barnið að hjálpa þér við eitthvað inni í eldhúsi. • Hafirðu ekki tök á því að eiga samtal við barnið í einrúmi skaltu finna tíma með barninu, helst eins fljótt og auðið er. Barnið þarf að fá að vita nákvæmlega hvenær og hvar samtalið á að fara fram. Leggðu áherslu á að þú viljir gjarnan tala við barnið og hlusta á það, en að þú getir það ekki nákvæmlega núna. Slík skýring þarf að vera skiljanleg barninu. • Það er mjög mikilvægt að vera til staðar og hlusta vel þegar barn hefur átt frumkvæði að því að segja frá. Barnið getur verið hrætt og misst kjarkinn ef það upplifir að hinn fullorðni hafi ekki tíma. HVERNIG Á SAMTALIÐ AÐ FARA FRAM? Hlustaðu á barnið og hjálpaðu því að segja frá Það getur verið erfitt fyrir börn að tala um og koma orðum að því sem þau hafa upplifað. Hinn fullorðni getur aðstoðað með því að nota virka hlustun og hvatningu í samtalinu, t.d. með því að segja „segðu mér“, endurtaka það sem barnið segir eða spyrja spurninga til að fá nánari lýsingar á því sem gerðist, með hverjum og hvar. Fullorðna manneskjan ætti ekki að spyrja leiðandi spurninga. Það getur líka verið skynsamlegt að spyrja hverjir aðrir viti af þessu, hvort það hafi komið fyrir aðra, og hvort barnið haldi að það gæti gerst aftur. Sem fullorðin manneskja verður þú að sýna einlægan áhuga á því sem barnið segir. Gættu þess að túlka ekki það sem barnið segir út frá þínum eigin bakgrunni, heldur hlusta á það sem er í raun verið að segja. Spyrðu spurninga til að fá ítarlegri skýringar, ef þú ert ekki alveg viss um hvað barnið á við. Dæmi um fullyrðingu sem hægt er að túlka á mismunandi vegu er: Barn: „Hefurðu prófað rassakynlíf?“ Fullorðin manneskja: „Rassakynlíf? Hvernig kynlíf er það?“ Barn: „Þú veist, þegar maður snýr bakinu í hvort annað og nuddar rössunum saman.“ Hér kom í ljós að barnið lagði allt aðra merkingu í orðið „rassakynlíf“ en líklegt má telja að fullorðna manneskjan gerði. Það er því mikilvægt að þú spyrjir spurninga til að fá nánari skýringar og forðast misskilning.
RkJQdWJsaXNoZXIy MjIxNzc=