Lesið í skóginn

7 YNGSTA STIG MIÐSTIG UNGLINGASTIG Hvað éta skógarfuglar? 40212 – LESIÐ Í SKÓGINN Höfundur: Ólafur Oddsson Markmið: Að nemendur tengi saman hvar fuglategundir dvelja og hvers vegna, sjái tengslin á milli aðstöðunnar og fæðuframboðsins og læri að þekkja hvað einstakar fuglategundir éta og hvers vegna. Auka þekkingu á umhverfinu og efla hæfni í greiningu á aðstæðum. Námsgreinar: Samfélagsgreinar, náttúrugreinar. Tæki og tól: Nauðsynlegur undirbúningur er að fara í gegnum lífshlaup þeirra fugla sem unnið er með og hvaða þættir skipta máli í fæðuvali hverrar tegundar. Bækur og annað efni um fugla, skordýr og fræ. Fuglavefurinn og www.fuglar.is . Skriffæri, pappír og kíkir. Verklýsing: Farið í skoðunarferðir, sérstaklega til að kortleggja fæðuframboð einstakra fugla- tegunda og um leið hvaða fuglar sjást í skóginum. Upplýsingum safnað og fuglar sem sjást skráðir. Leitað að hugsanlegri fæðu þeirra: skordýrum, berjum og fræjum á barr- og lauftrjám. Mikilvægt er að nemendur kynnist hvaða fuglar sækja sér fæðu í skóginn á hvaða árstímum og hvers konar fæðu einstaka tegundir nýta. Einnig að nemendur skilji hvaða áhrif fuglarnir hafa á lífríki skógarins og hvaða hættur geta steðjað að þeim. Unnið er með fugla sem hafa ólíkt fæðuval og viðveru í skógi, s.s. rjúpu, músarrindil, glókoll og skógarþröst.