Leikgleði - 50 leikir

Samvinnuleikir Leik gleði 14. Könglakapp Stutt lýsing: Liðakeppni þar sem keppst er um að ná sem flestu af ákveðnum efniviði á fyrirfram ákveðnum tíma. Námsmarkmið: • Þjálfun grunnhreyfinga • Líkamsvitund • Líkamshreysti • Samvinna Hvar: Hvar sem er á opnu svæði. Hvenær: Allt árið um kring. Tími: Ótakmarkaður. Fjöldi: Ótakmarkaður. Undirbúningur: Ákveða stað fyrir leikinn og í samvinnu við börnin ákveða hvaða hlut á að sækja. Áhöld: Könglar, steinar eða annar náttúrulegur efniviður sem nóg er af í nærumhverfinu. Hvernig: Stjórnandi byrjar á því að fá börnin til að safna ákveðnum fjölda af t.d. könglum úr umhverfinu. Ágætt er að miða við að hvert barn finni a.m.k. 6 stykki. Því næst er þeim skipt upp í fjögur jöfn lið sem hvert og eitt kemur sér fyrir við enda vallar eða hvert í sínu horni. Könglunum er komið fyrir á miðju vallarins jafn langt frá hverju liði. Þegar stjórnandi gefur merki hleypur eitt barn í einu og sækir einn köngul, flytur hann heim í sitt lið og næsta barn má þá fara af stað. Það lið sem er fyrst til að fá fyrirfram ákveðinn fjölda af könglum sigrar eða það lið sem er með flesta köngla þegar allir eru búnir. Útfærsla: Stjórnandi getur útfært leikinn eftir aldri og getu barnanna. • Í stað þess að hlaupa þegar köngull er sóttur gera börnin mismunandi hreyfingu s.s. hoppa á öðrum fæti, hoppa jafnfætis, gera froskahopp eða ganga aftur á bak. • Stjórnandi flautar og þá gera börnin hreystiæfingu. Þá verða þau sem eru að hlaupa inn að miðju að snúa við og fara á sitt heimasvæði, gera æfinguna og halda því næst áfram leiknum. Dæmi um hreystiæfingu er froskahopp, englahopp eða kviðæfingar. • Stjórnandi flautar og nemendur syngja saman eitthvert lag. • Tveir og tveir fara inn að miðju í einu, annar með bundið fyrir augun og hinn aðstoðar hann við að sækja köngul. • Hafa ólíkar hlaupaleiðir að miðju og öll lið prófa allar hlaupaleiðir.