Komdu og skoðaðu íslenska þjóðhætti

Fortíð, nútíð og framtíð Íslenskir þjóðhættir mótuðust þegar Ísland var einangrað frá öðrum löndum og þjóðin lifði fyrst og fremst af því að nýta náttúru landsins með landbúnaði og fiskveiðum. Í öðrum löndum, þar sem aðstæður voru öðruvísi, mótuðust aðrir siðir og aðrar venjur. Núna er flest breytt, störfin önnur og mikil samskipti við önnur lönd og fjarlægar heimsálfur. Lífshættir Íslendinga hafa breyst mikið og þeir lært nýja siði. Engu að síður er gaman og gagnlegt að vita hvernig fólk lifði áður fyrr. Það hjálpar okkur að skilja hvernig ýmislegt í nútímanum þróaðist; tungumálið, matargerð, handverk, þjóðtrú og siðir. Núlifandi kynslóð ber ábyrgð á að viðhalda ýmsum háttum og venjum svo að þeir sem síðar búa á Íslandi geti líka notið þeirra eins og við gerum. 32