Ísland, hér búum við - Kennsluleiðbeiningar

5 Ísland, hér búum við | Kennsluleiðbeiningar | © Menntamálastofnun 2019 | 7665 Markmið og uppbygging námsefnis Landafræði er þverfagleg fræðigrein sem hefur almennt menntunargildi. Landa- fræðin fjallar m.a. um tengsl ýmissa náttúru- og mannvistarþátta á yfirborði jarðar. Markmið landafræðikennslu er að auka vitund nemenda um umhverfi, samfélag og menningu. Með henni eru nemendur þjálfaðir í að leita svara við brýnum spurn- ingum samfélagsins um hversdaginn og framtíðina. Þá fá þeir þjálfun í að greina og túlka landslag og annað umhverfi og átta sig á tengslum milli athafna manna og náttúrufars. Nemendabókin Ísland, hér búum við tekur mið af hæfniviðmiðum aðalnámskrár í samfélasgsfræði 2013 fyrir miðstig. Hæfniviðmiðin má sjá aftar í kennsluleið- beiningum þar sem hver kafli er tekinn fyrir sig. Það veltur á skipulagi í hverjum skóla á hvaða aldri bókin er kennd. Nemendabók er skipt upp í nokkra kafla eftir efnistökum. Hver kafli hefst á nokkrum punktum um hvað kaflinn fjallar um, örstutt samantekt. Nota má þessa punkta til að vekja umræður í bekknum áður en byrjað er á köflunum. Víða í bókinni eru ramma- greinar sem líta má á sem eins konar auka- og ítarefni, m.a. gerðar til að brjóta upp efni lesbókar og auðvelda þannig nemendum lesturinn. Neðst á hverri blaðsíðu eru hugtök úr megintexta útskýrð frekar. Útskýrð hugtök eru feitletruð í megintextanum. Hugtökin gæti þurft að ræða og útskýra enn frekar fyrir nemendum, jafnvel skrifa skipulega niður, þar sem ólíklegt er að allir hafi fullan skilning á þeim. Aftast í bókinni er atriðisorðaskrá, tölfræði um Ísland og nokkur kort sem gott getur verið að nota jöfnum höndum. Kaflar nemendabókar eru eftirfarandi: • Ísland ; landafræðin útskýrð fyrir nemendum. Þar er vetrarmynd af Íslandi sem ræða má fram og til baka. • Kort og kortalestur ; mikilvægi korta útskýrt og það að þekkja áttirnar vel. Farið í mælikvarða, ólík kort. Kortalestri eru gerð skil þar sem fjallað er um liti, tákn og hæð í kortum. • Við búum á Íslandi ; þar er fjallað um landsmenn og íslenskuna, stjórnun landsins og helstu staðreyndir um Ísland. Einnig er farið yfir dreifingu íbúa um landið og ólíka skiptingu þess í t.d. sveitarfélög og lögregluumdæmi. • Náttúra Íslands ; snýst um þá þætti sem móta náttúru Íslands, s.s. veður og loftslag og árstíðir. • Myndun og mótun Íslands ; þar er fjallað um hvernig Ísland varð til og helstu krafta þar að baki. Farið er nánar í hvern þann landmótunarþátt sem mótað hefur landið eins og eldgos, jarðskjálfta og ís. Einnig er farið í rof (flutning efnis í náttúrunni) og helstu roföflin, sjó, jökla, ár og vind sem mótað hafa landið í milljónir ára og mótað það landslag sem við þekkjum í dag.