Ísland - Hér búum við

82 Hálendið Náttúra Hálendið, líka kallað miðhálendið eða óbyggðir, nær yfir svæði í miðju landsins sem er í 500 metra hæð yfir sjávarmáli. Þar í um 400-500 metra hæð er að finna fjölbreytta náttúru, m.a. eldfjöll, hveri, sanda, jökla, ár, stöðuvötn og einstaka gróðurvinjar . Stór hluti hálendisins er á eldvirku svæði. Má þar t.d. nefna yngsta hraun landsins, Holuhraun, sem varð til árið 2014. Gróðurvin er gróið svæði í eyðilegu umhverfi. Vötn og fljót Mestu vötn á hálendinu eru Langisjór, Þórisvatn, Öskjuvatn og Hvítárvatn. Þórisvatn hefur verið stækkað vegna virkjanaframkvæmda og er stærsta vatnið á landinu í dag. Einnig má nefna Blöndulón, Hágöngulón og Hálslón en þau eru manngerð vegna virkjana. Stærstu fljót landsins eiga upptök sín í jöklum á hálendinu og renna þaðan til sjávar. Fyrst skal nefna Þjórsá, lengsta fljót landsins, um 230 km langt. Margar þverár falla í Þjórsá á leið hennar til sjávar. Önnur vatnsmikil og löng fljót eru Jökulsá á Fjöllum, Hvítá, Blanda, Skaftá og Skjálfandafljót. Langisjór er um 20 km langt vatn á hálendinu. Fiskur er í vatninu.