Hugfinnur - handbók um bókmenntahugtök

94 Örsaga Örsaga er stutt en áhrifarík frásögn í óbundnu máli. Textinn er frekar hlutlægur, hnitmiðaður með ljóðrænu ívafi og er ætlað að vekja lesandann til umhugsunar. Viðfangsefnið afmarkast við eitthvað ákveðið, t.d. einn atburð, upplifun, tilfinningu, einmanaleika, hamingjustund, minningu, vonbrigði, hugsun, draum eða söknuð. Persónur eru fáar, oft ein til þrjár, og lesand- inn á auðvelt með að finna til samkenndar með þeim án þess að þeim sé lýst nákvæmlega. ör það var einu sinni hópur fólks sem hafði orðið til á netinu. þetta var fólk með ör sem vildi segja sögur. þetta fólk vakti áhuga minn af því ég hafði sjálfur verið að skrifa örsögur og hefi all nokkur ör. ég komst í samband við konu sem hafði verið skorin svo oft upp að það er í raun eitt af undrum veraldar að hún var í einu lagi. örsögur hennar voru spennandi og harmrænar því með hverjum skurði kvarnaðist úr sjálfsmynd hennar og hún varð sífellt þunglyndari. ekkert færði henni nokkra gleði, ekki leikhús, kvikmyndahús eða symfóníu- tónleikar. ég spurði hana hvort hún hefði reynt fyrir sér á verðbréfamarkaði. henni fannst það ekki einu sinni fyndið, sagðist vart eiga fyrir þunnildum og undanrennu. ég benti henni á að frelsarinn hefði fastað í mánuð eða lengur og að hún gæti því allt eins lagt fiskinn og mjólkina undir. hún skellti á mig. nokkru síðar vorum við aftur farin að tala saman. það kom að því að hún spurðist fyrir um mín ör og mínar örsögur. ég sagði henni þær sem ég hélt að væru mest krassandi. hvernig ég sagaði inn í lið á vísifingri, sagaði í handarbak mitt með langsög, skar mig með hnífi á ofanverðum þumli, fékk í mig sporjárn og loks greindi ég frá flísinni eða bjálkanum sem ég fékk eitt sinn í augað. konan ráðlagði mér að sýsla með eitthvað annað en smíðatól. við hættum að hringjast á og ég heyrði ekkert af henni fyrr en í drottningarviðtali í dv þar sem hún fagnaði því að hafa verið kosin stjórnar- formaður stórfyrirtækis. hún sagði hæversk að þetta hefði allt byrjað með lítilli upphæð sem hún hefði nurlað saman og notaði til kaupa á fyrstu bréfunum. í viðtalinu kom fram að fjárhagslegt og andlegt atgervi konunnar líktist einna helst ferli einkaþotu sem tekur á loft. ráðgjafi konunnar, en hans var ekki getið í viðtalinu, var heldur ekki á flæðiskeri staddur. hann hélt til náms í danmörku til að læra allt varðandi umgengni og öryggi við vinnuvélar. Birgir Svan Símonarson