Hugfinnur - handbók um bókmenntahugtök

22 Endurlit Hefðbundin frásögn í skáldskap líður áfram í réttri tímaröð. Stundum er frásögn skyndilega brotin upp og farið aftur í tímann. Þá er sagt frá atburðum sem gerðust áður en sagan hófst eða það rifjað upp sem áður hefur verið sagt frá. Slík frásagnaraðferð kallast endurlit. Hlutverk þess getur verið að skapa spennu eða bæta við upplýsingum um persónur skáldverksins. Endurlit er algeng frásagnaraðferð í nútímakvikmyndum og sjónvarpsþáttum og hefur verið notuð í bókmenntum í margar aldir. Grettir sat við gluggann á hótelherberginu og horfði út á sjóinn. Stór kökkur í hálsinum og hjartað barðist um í brjósti hans. Þvílík vandræði sem hann hafði komið sér í, þvílíkur klaufagangur og óheppni. Hann gæti ekki litið framan í nokkurn mann næstu árin. Í fjarska sá hann flutningaskip á siglingu. Skip líkt og pabbi hans hafði unnið á alla sína ævidaga. Grettir lokaði augunum og sá pabba sinn fyrir hugskotsjónum. – Niður landganginn gengur einkennisklæddur maður, pabbi hans. Hann fullur eftirvæntingar og tilhlökkunar. Nú yrði allt betra heima, nú yrði hlegið og gantast. Gestir í stofunni. Ísskápurinn fullur af gómsætum mat. Göngutúrar og bíóferðir. Friður, ró, öryggi. SKS Úr Völuspá Sal sér hún standa sólu fegra, gulli þaktan á Gimlé. Þar skulu dyggvar dróttir byggja og um aldurdaga yndis njóta. Völuspá er goðakvæði ort undir fornyrðis- lagi. Í lok kvæðisins sér völvan fyrir sér nýjan heim rísa í kjölfar ragnaraka sem var spáin um heimsendi.