HÖNNUN KÖNNUN

3 5 Æfing 10 – Græn hönnun Endurvinnsla · tvívíð – þrívíð hönnun Tímalengd: 80-160 mínútur + heimavinna Græn hönnun og endurvinnslutunnur skólans. Óhefðbundin auglýsingaherferð. Unnið með endurnýtt efni. Aðferð: Til að auglýsa endurvinnslutunnurnar hanna nemendur tví- eða þrívíðan hönnunargrip, t.d. lampa eða skapalón fyrir skúlptúr úr pappír/rusli upp úr endurvinnslutunnum skólans. Tilgangurinn með því er að auka meðvitund og þátttöku nemenda í því að endurvinna og fara vel með pappír/efni. Jafnframt má fara í geymslur skóla og finna dót til að vinna með. Nemendur skissa og ræða málin í hópum á fundum. Þeir koma sér saman um lausn og hefjast handa við undirbúning og framkvæmd. 1. Hugmyndavinna: Nemendum má koma af stað í hugmyndavinnu með því að huga að eftirfarandi atriðum: einfaldleika í framkvæmd, stærð og lögun og táknrænum tengingum, óhefðbundinni framsetningu, hreyfingu og/eða frumleika í framsetningu og útsjónarsemi. Huga skal að orðum og orðasamböndum sem hægt væri að myndgera og/eða snúa við merkingarlega. Ef nemendur ná ekki tengingu við verkefnið má gefa þeim vísbendingar um frumlega nálgun eins og að búa til lampa sem lýsir á tunnuna úr endurunnu efni, óróa, brúður o.s.frv. Önnur dæmi um nálgun er að vinna út frá tvíræðum orðum eða orðasamböndum t.d. orðum eins og „uppvakningar“ eða „upprisa“ o.s.frv. 2. Nemendur finna setningu sem getur staðið með verkinu eða verið verkið (til að auka áhrifin) og útfæra. 3. Nemendur vinna verk og setja upp. Nemendur taka myndir af verkinu og skjalfesta og birta á vef/bloggi/blaði. 4. Nemendur skrifa örstutta útskýringu eða greinargerð með verki og setja inn á vef/blogg/blaðagrein. Ef nemendur fóru á vefinn og urðu fyrir áhrifum af einhverju skal vista myndir og tala um tengingar við viðkomandi listamann eða verk. Bjargir: Skissubækur, blöð, skriffæri, tölvur og teikniforrit, pappír (endurunninn), gamalt dót úr geymslum skóla, veraldarvefurinn. Grunnþættir: Læsi · sköpun · lýðræði og mannréttindi · heilbrigði og velferð · sjálfbærni Snertifletir við aðrar greinar: Íslenska · (tungumál) · myndmennt · leiklist · lífsleikni · saga · listasaga Ávinningur: Æfingin þjálfar hugmyndavinnu, myndlæsi og tilfinningagreind, eflir sjálfstæð vinnubrögð, hugvitssemi, útsjónarsemi, lausnaleit og e.t.v. nýsköpun og sundurhverfa hugsun og leikgleði. Æfingin eykur umhverfisvitund og eflir sjálfsmynd og félagslega ábyrgð og samfélagsvitund. Býr uppvakningur hér?