Fjölbreyttir kennsluhættir í dönsku

Danska | Fjölbreyttir kennsluhættir í dönsku |© Menntamálastofnun 2021 | 2869 70 TÓNLIST Verkefni tengd tónlist Hér eru nokkrar hugmyndir að verkefnum sem tengjast söngtextum. Hægt er að velja úr hvort þau séu einstaklings-, para- eða hópaverkefni. • Raða erindum, sem búið er að rugla, í rétta röð, á meðan hlustað er. • Innfyllingarverkefni. Mælt er með að kennari skrifi orðin upp á töflu þar sem erfitt getur reynst nemendum að heyra orðin nákvæmlega og einbeita sér að réttritun. • Myndum raðað eftir texta. Myndir má t.d. taka úr myndbandi sem fylgir laginu. • Innihaldsspurningar á dönsku eða íslensku út frá laginu/textanum. • Flokka orð eftir þemum. • Flokka orð í orðablóm/hugarkort/vendikort. Velta fyrir sér um hvað textinn fjallar. • Nemendur fá ljósrit af textabútum og reyna að setja textann rétt saman. Farið er yfir röðina með því að hlusta á lagið í lokin. • Endursögn texta á dönsku. • Semja nýjan texta við lag. • Hlusta á lag, lesa texta og syngja með. • Kennarinn les upp hluta úr lagi og nemendur skrifa upp eftir honum. Svo er hlustað á lagið á eftir. • Hlusta á og/eða lesa eina línu í einu. Nemendur finna upp látbragð sem passar við hverja línu. Nemendur hlusta svo á allt lagið í einu og „leika“ það. • Nemendur hlusta á tónlist og skrifa frjálst orð eða setningar sem koma upp í hugann meðan þeir hlustuðu. Ef til vill má svo vinna áfram með það sem nemendur skrifuðu niður. • Nemendur gera tónlistarmyndband. • Nemendur kynna sér danskan söngvara, hljómsveit eða lag sem þeir velja sér. Síðan kynna þeir afraksturinn fyrir bekknum. • Nemendur kynna danskt lag eða brot úr lagi fyrir bekknum. • Hópavinna. Hver hópur velur sér danska hljómsveit eða söngvara og kynnir sér. Annar hópur undirbýr viðtal við hópinn. Síðan er skipt um hlutverk. • Nemendur búa til myndband með frumsömdu rappi á dönsku.