27 Skattþrep: Skattþrepin eru 3. Fyrsta þrepið er með lægstu prósentuna 31,48%. Skattþrep tvö er með 37,98% og skattþrep þrjú er með 46,28% skatt. Tekjuskattur er greiddur af launum. Eftir því sem launin eru hærri þarf að greiða meiri skatt. Skuldabréf: Samningur milli þess er lánar og þess er fær lánað sem segir til um upphæð láns og hvernig á að endurgreiða það. Smálán: Lán sem einkafyrirtæki lána einstaklingum. Oft á mjög háum vöxtum og því óhagstæð. Sparnaður: Peningur sem lagður er inn í banka og geymdur þar, oft á bundnum reikningi. Staðgreiðsla: Þegar greitt er fyrir hlut eða upplifun að fullu á staðnum en ekki tekið lán fyrir því. Staðreyndir: Það sem er satt, búið að sýna fram á með rökum að sé rétt. Stéttarfélag: Félag launafólks sem sér um að semja um kaup og kjör þeirra sem í því eru. Stýrivextir: Vextir sem Seðlabankinn ákveður hverju sinni og eru þeir vextir sem lánastofnanir greiða Seðlabankanum fyrir að fá lán hjá þeim. Stýrivextir stjórna peningaflæði í landinu og stjórna þannig verðbólgu og gengi gjaldmiðils. Tollar: Þegar vörur eru fluttar inn til landsins þarf að greiða toll af þeim. Tollurinn er misjafnlega hár eftir því hver varan er. Sumar vörur eru ekki tollskyldar t.d. barnaföt. Tryggingar: Það eru keyptar tryggingar vegna þess að þegar eitthvað kemur fyrir, þá getur verið ómögulegt fyrir einstakling að borga þann skaða sem verður. Þá greiða tryggingarnar skaðann. Allir sem eiga bíl verða að tryggja hann með ökutækjatryggingu. Sú trygging bætir skaða sem bíllinn veldur öðrum, bæði fólki og öðrum bílum. Einnig er slysatrygging ökumanns inni í ökutækjatryggingu. Þeir sem eiga heimili, geymslur eða útihús verða að kaupa brunatryggingu sem bætir skaða sem verður af völdum bruna. Þegar keyptur er bíll með bílaláni þá krefst lánveitandinn þess oft að keypt sé kaskótrygging á bílinn. Kaskótrygging tryggir bílinn sem er tryggður þannig að ef hann lendir í tjóni fær eigandinn bílinn bættan á meðan ökutækjatrygging bætir eingöngu það tjón sem bíllinn veldur öðrum. Útborguð laun/ráðstöfunartekjur: Sá peningur sem greiddur er út til launþega. Útlán: Peningur sem fenginn er að láni í banka. Vanskilaskrá: Þegar einstaklingur tekur lán og getur ekki greitt af því þegar á að greiða og hefur ekki tök á að semja um að fresta greiðslum lendir viðkomandi á vanskilaskrá. Þegar einhver er kominn á þá skrá er erfiðara að fá lán. Ef viðkomandi er búinn að gera upp skuldina fer hann af vanskilaskrá ári síðar. Vaxtavextir: Vextir sem leggjast ofan á vexti sem eru fyrir. Þannig að vextir sem eru búnir að hækka upphæð eru notaðir til að fá meiri vexti næst. Veð: Þegar tekið er hátt lán er oft krafist þess að það sem keypt er fyrir lánið sé veðsett fyrir láninu. Þ.e.a.s. ef ekki tekst að greiða afborganir af láninu getur bankinn, eða sá sem lánaði, gengið að því sem er veðsett og tekið það til sín. Verðbólga: Verðbólga segir til um hversu mikið verð í þjóðfélaginu hefur hækkað. Verðhjöðnun: Þegar verð á hlutum lækkar verður verðhjöðnun. T.d. ef bílar hækka um 3% í verði en laun hækka um 7% þá er verðhjöðnun.
RkJQdWJsaXNoZXIy MjIxNzc=