Ég, þú og við öll

16 Geena Davis, frumkvöðull í rannsóknum á misrétti í afþreyingarefni Árið 2004 var bandaríska leikkonan Geena Davis að horfa á barnaefni með litlu dóttur sinni og tók þá eftir því hversu fáar kvenkyns persónur voru í barnaefninu. Geena ákvað að láta rannsaka málið og þá kom í ljós að það var ekki nema ein kvenkyns persóna á móti hverjum þremur karlkyns í barnaefninu. Í hópatriðum voru kvenkyns persónur ekki nema 17% hópsins. Í raunveruleikanum er um helmingur mannkyns konur og helmingur karlar. Geena Davis stofnaði samtök sem halda áfram að rannsaka hlutföll kynjanna í sjónvarpi, kvikmyndum og fleira afþreyingarefni. Með afþreyingarefni er átt við efni sem notað er sér til skemmtunar, s.s. sjónvarpsefni, kvikmyndir, tölvutækt efni, bækur og blöð. Samtökin rannsaka líka hvernig kvenkyns og karlkyns persónur eru látnar líta út, hegða sér og tjá sig. Einhverjum finnst kannski skrýtið að til séu samtök sem rannsaka hlutföll og staðalímyndir kynjanna í afþreyingarefni. Það hefur hins vegar komið í ljós að í afþreyingarefni er sýnd mjög skökk mynd af heiminum. Þar er mikið af einhæfum staðalímyndum sem sýna mjög takmarkaða eiginleika. Þar eru líka allt of fáar stelpur og konur, of fáir sem eru yngri en 20 og eldri en 50 ára, of fáir sem eru fátækir, of fáir sem hafa annan litarhátt en hvítan og of fáir sem eru með einhverja fötlun. Svona skökk heimsmynd getur haft áhrif á það hvernig við skynjum okkur sjálf og aðra í raunveruleikanum. Hvaða staðalímyndum hefur þú tekið eftir í barna- eða unglingaefni? Hvaða áhrif heldur þú að þær geti haft á þig?